Papa: Nuk kam frikë nga Trampi, kam detyrë morale të flas kundër luftës

Papa Leo XIV tha se kishte “një detyrë morale” të fliste kundër luftës dhe nuk i “frikësohej” presidentit Donald Tramp, ndërsa udhëheqësi amerikan kritikoi thirrjet e tij për t’i dhënë fund konfliktit në Lindjen e Mesme.

Papa u kishte thënë gazetarëve në bordin e aeroplanit papnor përpara se të mbërrinte në Algjer se nuk kishte “asnjë qëllim” të debatonte me Trampin, duke shtuar se ai “nuk ishte politikan”.

“Ajo që po them është se misioni i Kishës është shumë i qartë.”, tha ai.

“Ungjilli thotë të bekuar janë paqebërësit. Unë besoj se Kisha ka një detyrë morale të flasë shumë qartë kundër luftës dhe në favor të paqes dhe pajtimit.”

Ai gjithashtu i kishte kritikuar si “të papranueshme” kërcënimet e Trampit kundër civilëve në Iran dhe më parë kishte kritikuar edhe trajtimin “çnjerëzor” të administratës ndaj migrantëve.

Trampi e kishte quajtur Papën “të dobët në krim dhe të tmerrshëm për politikën e jashtme”, duke sugjeruar që kardinalët e zgjodhën Papën Leo vetëm në maj 2025, sepse ai ishte amerikan. Trampi postoi gjithashtu një imazh të gjeneruar nga inteligjenca artificiale që me sa duket e përshkruante veten si Jezu Krishti, por më vonë e fshiu atë.

Presidenti i Iranit, Masud Pezeshkian, e dënoi postimin e Trampit si një “fyerje” dhe “përdhosje” të Krishtit.