Tensionohen raportet Serbi – Hungari, përplasja e parë Vuçiq dhe Magyar

 

 

“Po e pyes: kush i sponsorizon? Hajde, mu përgjigj, meqë e di, thuaje kush është. Pra, ai nuk e ka idenë. Bëhet sikur nuk dëshiron të zbulojë gjithçka, vetëm t’ua bëjë qejfin Bashkimit Evropian, që ata të arrijnë në përfundimin se është Putini ose dikush i tillë. Nëse nuk do të isha i shqetësuar për marrëdhëniet me hungarezët në vendin tonë dhe me vetë Hungarinë, do ta quaja deklaratën e tij të pamend dhe të papërgjegjshme.”, - deklaroi presidenti i Serbisë, Aleksandar Vuçiq.

 

Magyar foli edhe për zbulimin e eksplozivëve pranë tubacionit të gazit në Serbi, afër kufirit hungarez, duke e cilësuar ngjarjen si të dyshimtë dhe se qeveria e tij do të hetojë saktësisht se çfarë ndodhi dhe nëse rreziku ishte real, ndërsa Vuçiqi u përgjigj se hetimi është çështje ekskluzive e autoriteteve serbe.

 

“Sa i përket çështjeve të tjera, sidomos hetimit të sulmit të tentuar ndaj gazsjellësit, ky nuk është vendi i tij dhe ai nuk ka asnjë autoritet në këtë vend për të kryer hetime. Ne i kryejmë hetimet në mënyrë shumë profesionale dhe objektive. Pra, për të qenë plotësisht i sinqertë, ky vend po zhvillon një hetim.”, - theksoi presidenti i Serbisë, Aleksandar Vuçiq.

 

Autoritetet serbe njoftuan më 5 prill se dy qese me eksplozivë ishin gjetur pranë tubacionit, i cili transporton gaz natyror rus në Hungari. Vuçiqi tha se, pasi të përfundojë hetimi, gjetjet e tij do të ndahen edhe me Magyarin.

 

Pavarësisht shkëmbimeve të ashpra të deklaratave, të dy udhëheqësit shprehën dëshirën për të ruajtur marrëdhënie të mira dypalëshe. Vuçiqi gjithashtu i dërgoi Hungarisë një mesazh urimi pas zgjedhjeve të së dielës.