SHBA: Tregtia iraniane përmes Ngushticës së Hormuzit është ndalur plotësisht

Anijet luftarake amerikane kanë bllokuar në mënyrë efektive tregtinë iraniane përmes Ngushticës së Hormuzit, tha Komanda Qendrore e SHBA-së (CENTCOM).

“Një bllokadë e porteve iraniane është zbatuar plotësisht, ndërsa forcat amerikane ruajnë epërsinë detare në Lindjen e Mesme”, tha komandanti i CENTCOM-it, admirali Brad Cooper, në një deklaratë të martën në mbrëmje.

“Në më pak se 36 orë që nga zbatimi i bllokadës, forcat amerikane kanë ndaluar plotësisht tregtinë ekonomike që hyn dhe del nga Irani nëpërmjet detit”, shtoi Cooper.

Wall Street Journal (WSJ), duke cituar dy zyrtarë amerikanë të paidentifikuar, raportoi më parë se më shumë se 20 anije tregtare, përfshirë anije cisternë, kishin kaluar nëpër ngushticë gjatë 24 orëve të fundit.

Sipas AFP-së, të paktën dy anije të sanksionuara nga SHBA-të lundruan nëpër Hormuz të hënën: transportuesi i kontejnerëve Kashan me flamur iranian dhe anije cisternë Elpis me flamur të Komoros.

WSJ raportoi gjithashtu se SHBA-të kanë kapur tetë cisterna që nga fillimi i bllokadës të hënën në mëngjes.