Vazhdon seria e Mbappes pa trofe të Ligës së Kampionëve

Edhe pse ka fituar 18 trofe me klube në karrierën e tij, si dhe Kupën e Botës dhe Ligën e Kombeve me ekipin kombëtar francez, Liga e Kampionëve mbetet e pamundur për sulmuesin francez Kylian Mbappe.

Në dhjetë sezone me Monacon, PSG dhe Real Madrid, më afër një trofeu ishte në vitin 2020, kur PSG humbi 1-0 ndaj Bayern Munich në finale. Ai arriti në gjysmëfinale edhe dy herë me ekipin parizien, një herë me Monacon, por që kur u transferua te Real Madrid është ndaluar dy herë në çerekfinale.

Në total, në 10 sezone ai ka një finale, tre gjysmëfinale, dy çerekfinale dhe katër raunde të 16-tave.

Mbappe ka shënuar gjithsej 70 gola në 98 paraqitje në Ligën e Kampionëve dhe aktualisht është golashënuesi i gjashtë më i mirë në historinë e garës elitare të Kontinentit të Vjetër.

Përpara tij janë Cristiano Ronaldo (140), Lionel Messi (129), Robert Leëandoëski (109), Karim Benzema (90) dhe Raul (71). Të gjithë këta kanë fituar të paktën një herë në "Ligën e Kampionëve".

Në sezonin e tij debutues në Ligën e Kampionëve, 2016/17, ai shënoi gjashtë gola për Monacon, të cilët u eliminuan në gjysmëfinale nga Juventusi. Ai shënoi më shumë këtë sezon, plot 15 gola, por kjo nuk mjaftoi që "Klubi Mbretëror" të kalonte çerekfinalet. Sulmuesi francez mban gjithashtu një sërë rekordesh në Ligën e Kampionëve.

Ai është lojtari më i ri që arrin dhjetë gola (18 vjeç e 350 ditë), lojtari më i ri francez që shënon në raundin eliminator të Ligës së Kampionëve (18 vjeç e 63 ditë), lojtari më i ri që shënon më shumë se një gol në një ndeshje të raundit eliminator të Ligës së Kampionëve (18 vjeç e 113 ditë), lojtari më i ri francez që shënon një hat-trick në Ligën e Kampionëve (20 vjeç e 306 ditë), lojtari më i ri që shënon një hat-trick jashtë shtëpisë në ndeshjen eliminatore të Ligës së Kampionëve (22 vjeç e 58 ditë).

“Për mua, Liga e Kampionëve zë një vend shumë të rëndësishëm. Humbëm në faza të ndryshme, vuajtëm. Nëse e fitoj, do të ketë shumë emocione. Edhe pse Kupa e Botës është Graali i Shenjtë, për mua, në nivel klubesh, Liga e Kampionëve është më e mira. Liga e Kampionëve, siç thotë kënga, është për 'les meilleures équipes”, tha francezi 27-vjeçar.

Renditja e Mbappe në Ligën e Kampionëve

2016/17 në Monako - gjysmëfinale

PSG 2017/18 - Raundi i 16-tave

PSG 2018/19 - Raundi i 16-tave

PSG 2019/20 - finalja

PSG 2020/21 - gjysmëfinale

PSG 2021/22 - Raundi i 16-tave

PSG 2022/23 - Raundi i 16-tave

PSG 2023/24 - gjysmëfinale

2024/25 Real Madrid - Çerekfinale

2025/26 Real Madrid - Çerekfinale