“Kur Gonxhja Çeli” promovohet libri me poezi i M. Emurllahit

 

“Unë do të doja që ju këtë libër ta lexoni, ta lexoni dhe të reflektoni mbi këtë libër ashtu siç është, pasi e njëjta gjë na duhet për rrugëtimin tonë të ardhshëm. Me këta krijues të rinj të shoqatës dhe të tjerë, unë besoj se do ta arrijmë qëllimin tonë.”, u shpreh Muhaxher Haruni.

 

Të pranishmit i përshëndeti edhe përfaqësuesi nga Komuna e Tetovës, nga sektori i Arsimit, Nazmi Dauti, i cili përgëzoi autoren dhe inkurajoi të rinjtë që të merren me krijimtari artistike.

 

“Është nder për Komunën e Tetovës të jemi pjesëmarrës në këtë promovim dhe ne gjithmonë do t’i përkrahim nxënësit dhe talentët e rinj si institucion, si themelues i shkollave.”, u shpreh Nazmi Dauti.

 

Autorja e librit Kur Gonxhja Çeli, Merita Emrullahi, ndau emocionet e saj për botimin e librit dhe falënderoi të gjithë kontribuuesit.

 

“Ka momente në jetë kur fjalët nuk mjaftojnë për ta përshkruar peshën e një emocioni. Sonte është njëra prej tyre. Jo rastësisht e zgjodha pikërisht këtë amfiteatër të shkollës sime të mesme për ta promovuar librin tim të parë. Nuk është thjesht një hapësirë – janë këto korridore, këto mure dhe kjo frymë shkollore ku hodha vargjet e para. Shumë nga këto shkrime që sot janë në libër kanë lindur këtu, mes bankave të një adoleshenteje.”, u shpreh Merita Emrullahi.

 

Promovimi u përmbyll me interpretime artistike, ndër to edhe performanca me flaut nga vetë autorja, e cila më herët ka marrë pjesë në gara komunale dhe shtetërore, duke u vlerësuar me çmime. Në fund, ajo ndau mirënjohje për të pranishmit.