Ukraina me thirrje ndaj BE-së, kërkon zhbllokimin e paketës prej 90 miliardë eurosh

 

“Është me rëndësi kryesore që paketa evropiane e mbështetjes për Ukrainën, 90 miliardë euro për dy vite, të zhbllokohet. Këto mjete tashmë janë miratuar nga Këshilli Evropian, por janë bllokuar. Nuk duhet të ketë më asnjë arsye për bllokimin e tyre. BE-ja i kërkoi Ukrainës të riparojë naftësjellësin “Druzhba”, i cili u shkatërrua nga Rusia. Ne e riparuam dhe shpresojmë që BE-ja të përmbushë edhe detyrimet e saj të rëna dakord.”, - deklaroi presidenti i Ukrainës, Volodimir Zelenski.

 

Sllovakia është e gatshme të mbështesë paketën e 20-të të sanksioneve të BE-së ndaj Rusisë, pas rifillimit të rrjedhës së naftës përmes naftësjellësit “Druzhba”.

 

“Sipas vlerësimit tonë, kjo nuk do të ketë ndikim në ekonominë sllovake, por do ta bëjmë vetëm pasi nafta ruse të mbërrijë sërish në Sllovaki përmes naftësjellësit.”, - theksoi ministri i Jashtëm i Sllovakisë, Juraj Blanar.

 

Ndërkohë, Kremlini thotë se është duke u përgatitur të vazhdojë dërgesat e naftës, por se kjo varet nga Kievi. Presidenti rus, Vladimir Putin, tha se vendi synon krijimin e një “zone sigurie” në rajonet kufitare me Ukrainën për të eliminuar çdo kërcënim.

 

“Zona e sigurisë për të cilën flasim po krijohet gradualisht në territorin fqinj. Do të vazhdojmë të veprojmë kështu deri sa të eliminojmë kërcënimin ndaj rajoneve tona kufitare.”, - u shpreh presidenti i Rusisë, Vladimir Putin.

 

Në front, luftimet vazhdojnë. Ukraina i ka kërkuar Turqisë që të marrë rolin e vendit ndërmjetësues dhe të organizojë një takim mes Zelenskit dhe Putinit, me synim arritjen e një zgjidhjeje sa më të shpejtë për përfundimin e luftës.