Qeveria miraton propozim-ligjin e arsimit të lartë, Sali: Janë përfshirë të gjitha sugjerimet

 

“Kemi arritur suksesin që të kemi një ligj të rafinuar mirë dhe që do t’i përgjigjet të gjitha nevojave të arsimit të lartë në periudhën e ardhshme, ajo nënkupton marrëveshjen, ose një pikë e rëndësishme, që ka qenë si shqetësim te punonjësit akademik, heqja e H indeksit, e cila në të kaluarën ishte si kriter bazë për zgjedhjet akademike apo avancimet akademike. Tani, nuk do të jetë kjo, do të jetë e drejtë e universiteteve brenda. Për raste të caktuara ku ka dy ose më tepër kandidatë, H faktori të jetë një nga faktorët vendimmarrës. Kemi garantuar edhe të punësuarit në universitetet tona se asnjë i punësuar nuk do të largohet nga vendi i punës.”, - deklaroi zëvendëskryeministri i parë, Bekim Sali. 

 

 

Nga BDI-ja nuk besojnë se VLEN-i ka adresuar të gjitha problemet dhe sipas tyre, vetëm se po bëhet eufori në opinion. Deputet e BDI-së nuk do ta mbështesin propozim-ligjin në Kuvend.

 

“Mendoj se është një eufori, të cilën ata po e bëjnë jehonë nëpër rrjetet sociale. Mendoj që arritja për ta mënjanuar H indeksin është një shkas për t’u tërhequr vëmendja nga problemet serioze të këtij propozim-ligji, që kanë të bëjnë kryesisht si me autonominë financiare, gjithashtu edhe me centralizimin e vendimmarrjes.”, - theksoi deputetja e BDI-së, Arbana Pasholli.

 

Për miratimin e ligjit, përpos shumicës së thjeshtë prej 61 votave, nevojitet shumica e Badinterit, të komuniteteve joshumicë dhe në mungesë të së njëjtës vihet në pikëpyetje miratimi i ligjit. Opozita gjatë gjithë kohës ka ngritur shqetësimet nëse propozim-ligji shton kontrollin e shtetit ndaj universiteteve dhe preket autonomia e tyre edhe pse pushteti këmbëngul të kundërtën dhe nënvizon se synimet kryesore janë cilësia më e lartë, lidhja me ekonominë e punës, si dhe modernizimi i studimeve.