Botime shkencore, Bejtulla sjell analizën mbi krimin e organizuar

 

“Qëllimi është të ofroj një pasqyrë të qartë dhe realiste se si funksionojnë këto struktura, cilët janë faktorët që i ushqejnë dhe si ndërveprojnë me shtetet, institucionet dhe tregjet ilegale. Krimi i organizuar nuk është i pathyeshëm, ai forcohet aty ku ka padituri, ai ngritet aty ku ka frikë, por ai mbijeton aty ku mungon strategjia, por dobësohet dhe bie kur përballet me profesionalizëm, dije dhe institucione që e dinë se çfarë bëjnë.”, - deklaroi studiuesi i kriminalistikës, Rijad Bejtulla.  

 

Sipas njohësve të shkencave juridike, vlera shkencore e librit është qasja ndërdisiplinore, që mundëson të kuptohet krimi i organizuar jo si një fenomen i izoluar, por si produkt i ndërveprimit kompleks mes kulturës tradicionale, tranzicionit politik, krizave ekonomike dhe globalizimit të tregjeve ilegale. 

 

“Një aspekt me rëndësi të veçantë është analiza e marrëdhënies mes krimit të organizuar dhe shtetit, kapitujt që kanë të bëjnë me korrupsionin, lidhjet kriminale politike, dobësitë institucionale, sfidat e luftës kundër krimit të organizuar, rolin e SPAK-ut, OFL-së, bashkëpunimin me Europoli, Interpolin dhe NATO-n i japin këtij libri një dimension analitik dhe normativ. Këtu autori nxit reflektim mbi kapacitetin dhe vullnetin e shtetit për të vepruar, si dhe mbi kufijtë real të reformave në një shoqëri me traditë të gjatë klientelizmi dhe kapje politike.”, - theksoi recensenti i librit, Afrim Osmani.  

 

Analiza synon të krijojë një model analitik të krimit të organizuar shqiptar, i cili mund të përdoret si referencë akademike dhe si udhëzues praktik për profesionistët e sigurisë. Sipas studiuesve,  libri ofron material  të vyer për studime të mëtejme në fushën e kriminalistikës edhe përtej Ballkanit.