Tramp: Zgjatet armëpushimi Izrael - Liban

Në një postim në platformën Truth Social, Trampi tha se takimi, ku morën pjesë edhe zëvendëspresidenti JD Vance dhe sekretari amerikan i Shtetit Marko Rubio, “shkoi shumë mirë”. Ai shtoi se ShBA-ja do të punojë me Libanin për ta ndihmuar të mbrohet nga Hezbollahu.

 

Ndërkohë, ambasadori i Izraelit në OKB, Deni Danon, deklaroi se nuk është i sigurt nëse armëpushimi do ta ndalë plotësisht konfliktin mes Izraelit dhe Hezbollahut. Ndërkohë, çmimet e naftës janë rritur lehtë në tregjet aziatike edhe pas njoftimit për zgjatjen e armëpushimit. Nafta Brent u rrit për 0.7 për qind, duke arritur në afro 105.80 dollarë për fuçi, ndërsa nafta amerikane u rrit për 0.6 për qind në 96.50 dollarë.

 

Rritja e çmimeve vjen pasi Trampi deklaroi se ShBA-ja do të shtyjë sulmet ndaj Iran deri në paraqitjen e një “propozimi të unifikuar” nga Teherani. Në të njëjtën kohë, transporti i naftës përmes Ngushticës së Hormuzit mbetet kryesisht i bllokuar, duke shkaktuar pengesa në rrjedhat globale të energjisë.