Maqedoni
Ministria e Punëve të Brendshme, aksion kundër mjeteve të paligjshme mjekësore
24.04.2026 14:41
Autoritetet kompetente në vend kanë nisur një aksion të gjerë kundër një grupi të organizuar...
Autoritetet kompetente në vend kanë nisur një aksion të gjerë kundër një grupi të organizuar, përfshirë mjekë të shquar, të përfshirë në kontrabandën dhe aplikimin e Botox-it dhe fillerave. Hetimi zbulon rreziqe serioze shëndetësore për pacientët dhe dështime sistemike në kontrollin e furnizimeve mjekësore të importuara përmes kanaleve të paligjshme nga Kina, Turqia dhe Serbia. Siç raportohet nga Prokuroria për Ndjekjen e Krimit të Organizuar dhe Korupsionit, disa persona janë ndaluar aktualisht, por për shkak të fushëveprimit dhe seriozitetit të rastit, operacioni po zgjerohet me kërkime të reja dhe arrestimin e personave të tjerë të përfshirë.
"Në kuadër të një procedure për importin dhe shpërndarjen e organizuar të paligjshme të pajisjeve mjekësore të përdorura në procedurat estetike, nën udhëheqjen e një prokurori publik nga Prokuroria Publike për ndjekje të krimit të organizuar dhe korrupsionit, Resori për kontrollin e Krimit të Organizuar në Ministrinë e Brendshme po kryen ende një veprim të koordinuar, gjatë të cilit po kryhen kërkime intensive në disa lokacione në të gjithë vendin. Aksioni është rezultat i ekzistencës së bazave për dyshim për kryerjen e veprave penale të bashkimit kriminal, shkeljes së të drejtave të pronësisë industriale dhe përdorimit të paautorizuar të kompanisë së tjetrit dhe marrjes së ryshfetit.”, thonë nga Prokuroria për Ndjekjen e Krimit të Organizuar dhe Korupsionit.
Mjekët nga klinikat dhe ordinancat private janë arrestuar tashmë, pas kërkimeve që u kryen dje në Shkup, Manastir dhe Strumicë. Deri më tani janë sekuestruar një sasi e madhe ilaçesh dhe pajisjesh mjekësore, një automjet luksoz, para, parfume dhe telefona. Sipas informacioneve fillestare, fillerat nuk kishin miratim, udhëzime dhe afishe dhe ishin importuar nga Kina, Serbia dhe Turqia.
VLORA LATIFI TOPOJANI