Kuvendi nuk zgjodhi presidentin, Kosova do të shkojë në zgjedhje të jashtëzakonshme

 

“Kjo seancë shënon fundin e këtij procesi dhe fundin e kësaj legjislature, fatkeqësisht. Sipas aktgjykimit të Gjykatës Kushtetuese, Kuvendi konsiderohet i shpërndarë dhe zgjedhjet do të shpallen brenda afatit kushtetues.”, - deklaroi kryetarja e Kuvendit, Albulena Haxhiu.

 

Për moszgjedhjen e presidentes, kryeministri Albin Kurti ka bërë fajtor opozitën, e cila nuk e mundësoi kuorumin prej 80 deputetësh, i nevojshëm për zgjedhjen e presidentit.

 

“Kosova si shtet i pavarur, si republikë demokratike, mund të ketë presidente të re, mirëpo ajo që mungon është opozita aty, e cila me sjelljen e saj joshtetërore, antiinstitucionale, me bojkotin dhe me bllokimin, pamundësoi konsumimin e raundit të parë për të vazhduar me raundin e dytë dhe të tretë.”, - theksoi kryeministri i Kosovës, Albin Kurti.

 

Por, akuzat e Kurtit i hedhin poshtë partitë opozitare, sipas të cilave përgjegjëse për moszgjedhjen e presidentit është Lëvizja Vetëvendosje dhe kryeministri Albin Kurti. 

 

“Në thelb kishim një parti politike dhe një kryetar të saj, i cili në njërën anë është i pangopur me pushtet, i do të gjitha, dhe në anën tjetër është i paaftë të arrijë kompromis minimal.”, - theksoi kryetari i LDK-së, Lumir Abdixhiku.

 

“Ai në vazhdimësi ka përdorur gjuhë ofenduese, fyese ndaj subjekteve opozitare, duke përfshirë edhe PDK-në, por ne kemi vlerësuar se duhet ta ndërtojmë dhe ta hapim një kapitull të ri, e kemi tejkaluar dhe kemi pasur qasje me shumë konstruktivitet, me qëllim që të kontribuojmë në dobi të qytetarëve të Republikës së Kosovës dhe shtetit të Kosovës.”, - u shpreh Arian Tahiri nga PDK.

 

“Kryeministri i Kosovës e përdori, respektivisht e keqpërdori foltoren, duke e goditur skajshmërisht opozitën, duke u munduar ta hedh fajin tek subjektet politike opozitare në një gjendje bukur dëshpëruese dhe bukur tronditëse, të cilën e solli vet në Kosovë.”, - deklaroi Besnik Tahiri nga AAK.

 

Risi në këto zgjedhje pritet të jetë ajo se ish-presidentja Vjosa Osmani pritet të garojë në listë të përbashkët me LDK-në, si kandidate e kësaj partie për presidente. Ushtruesja e detyrës së presidentes Albulena Haxhiu ka nisur përgatitjet për shpalljen e datës së zgjedhjeve, për çka ka thirrur në konsultim kreun e KQZ-së, Kreshnik Radoniqi, për të vazhduar konsultimet edhe me krerët e partive politike.