Gjykimi për kabarenë “Puls”, prezantohet ekspertiza mjekoligjore

Me prezantimin e dëshmisë së ekspertit nga mjekësia ligjore, vazhdoi procesi gjyqësor në sallën e gjykimit në Burgu i Idrizovës për zjarrin tragjik në diskotekën “Puls” në Koçan, ku humbën jetën 63 persona dhe mbi 200 të tjerë u lënduan.

Para fillimit të gjykimit, avokatja e pronarit të diskotekës dhe të akuzuarit të parë, Dejan Jovanov - Deko, Ivana Kocevska, duke iu referuar kërcënimeve të prindërve ndaj klientit të saj nga seanca e kaluar, kërkoi përjashtimin e tyre nga procesi gjyqësor. Megjithatë, kjo kërkesë u refuzua nga Gjykata.

"Jap propozim për përjashtim jashtëzakonisht të domosdoshëm të publikut, duke pasur parasysh se gjykata është e detyruar të sigurojë rendin dhe mbrojtjen e të drejtave të të akuzuarve.", - deklaroi avokatja e të pandehurit, Ivana Kocevska.

"Së pari, do të paralajmërohen, pastaj do të përjashtohen dhe ndëshkohen. Dihet kur përjashtohet publiku, ndërsa gjatë kësaj periudhe ata nuk përbëjnë publikun, por palët e dëmtuara në procedurë. Nëse është e nevojshme, ata mund të përjashtohen individualisht.", - theksoi Dijana Gruevska Ilievska.

Njëherësh, mbrojtja e Jane Jançevskit dhe Martin Georgievit paraqiti kërkesë për heqjen e masës së arrestit shtëpiak, duke theksuar se arsyet për vendosjen e saj nuk ekzistojnë më.

Gjykata, para fillimit të seancës, informoi se po refuzohen si të pabazuara edhe kërkesat për heqjen e masave të sigurisë ndaj Bekim Haxhiut dhe Todor Jovanovit. Në seancën e sotme u lexuan gjithashtu deklaratat e dy dëshmitarëve, të cilët ishin gjithashtu të lënduar atë natë.

Gjatë marrjes në pyetje, ata u shprehën se nuk e dinë saktësisht se kush i kishte vendosur materialet piroteknike atë natë, por theksuan se bëhej fjalë për disa djem të rinj që i kishin vendosur ato.

Njëkohësisht, drejtori i Institutit të Mjekësisë Ligjore, Aleksandar Stankov, vazhdoi me prezantimin e ekspertizës mjekoligjore lidhur me rezultatet e analizave të autopsisë, të cilat ishin kryer mbi personat e vdekur dhe të lënduar.

Prokuroria në seancën paraprake, Prokuroria paraqiti gjetjet dhe mendimet e autopsisë nga Instituti i Mjekësisë Ligjore mbi shkaqet e vdekjes së viktimave, si dhe dokumentacionin mjekësor dhe të dhënat mbi të lënduarit që kërkuan ndihmë mjekësore pas zjarrit në të cilin vdiqën 63 persona, ndërsa u plagosën mbi 200 persona.

Rasti po ndiqet nga një ekip prej 15 prokurorësh publikë dhe udhëhiqet nga gjyqtarja Dijana Gruevska Ilievska. (Rexhep Qamili, TVM2)