Përvjetori i vdekjes së Dellçevit, përplasen partitë, VMRO: Fqinji mohon identitetin maqedonas

 

 

“Kemi edhe ashtu vende që për fat të keq e mohojnë identitetit e të madhit maqedonas, Goce Dellçev, mohojnë identitetin shumëshekullor maqedonas. Në shekullin 21 akoma populli maqedonas ballafaqohet me këto sfida për të cilat nuk do të duhej të ballafaqohej, dhe, për fat të keq, në vend se të luftojmë për të ardhmen evropiane, ne hapim çështje nga e kaluara, dhe, për fat të keq, disa nga ato çështje janë me rrënjë nga mesjeta.”, - deklaroi kryeministri, Hristijan Mickoski.

 

 

Por, lidhja socialdemokrate ndan mendimin se Bullgaria nuk mohon identitetin maqedonas, gjersa akuzon kryeministrin se me vetëdëshirë s’bën asgjë në drejtim të aspiratave eurointegruese.

 

Zgjidhja, sipas kreut të partisë, Filipçe, është nënshkrimi i rezolutës së ofruar nga ky subjekt që përfshin interesat e përbashkët nacionale, ndryshimet kushtetuese dhe hapjen e negociatave. Për më tepër, Filipçe akuzon  kryeministrin për krijim të armiqve artificial në fqinjësi.

 

“Ne nga Bullgaria asnjëherë nuk kemi dëgjuar se e mohon identitetin tonë dhe as që është bërë në kohën e qeverive të LSDM-së, diçka në Maqedoni që si rezultat të rrezikohej identiteti nacional. Ne e kemi një punë dhe dihet cila është rruga përpara, me qëllim që në të vërtetë t’i fillojmë negociatat, dhe ato janë ndryshimet kushtetuese. Është gënjeshtër atë qe e thotë Mickoski dhe VMRO. Pse? Sepse nuk do që vendi të shkojë përpara në Evropë.”, - theksoi kryetari i LSDM-së, Venko Filipçe. 

 

Për opozitën maqedonase, Mickoski erdhi në pushtet duke thënë se do ta ndryshojë kornizën negociuese, do të interesohet për pakicën maqedonase në Bullgari dhe së fundmi, si rezultat erdhi vetëm hyrja e tij në Qeveri.