Protesta e studentëve, të premten protesta do të zhvendoset në Prishtinë

 

“Ne, studentët e Kosovës, ju ftojmë t’i bashkoheni protestës paqësore para Ambasadës së Maqedonisë së Veriut në Kosovë, për të ngritur zërin kundër cenimit të së drejtës së përdorimit të gjuhës shqipe në provimin e jurisprudencës dhe në të gjitha provimet e tjera shtetërore në Maqedoninë e Veriut.”, thuhet në njoftim. 

 

Sipas Parlamentit Studentor, gjuha shqipe nuk është privilegj, por e drejtë e qindra mijëra shqiptarëve në Maqedoninë e Veriut.

 

 

Edhe ish-kryeministri i Kosovës, Ramush Haradinaj, ka shprehur mbështetje për protestën në përkrahje të studentëve shqiptarë në Maqedoninë e Veriut. 

 

“E drejta themelore për përdorimin e gjuhës shqipe, e garantuar me Kushtetutë është e pacenueshme dhe nuk duhet të vihet në pikëpyetje nga askush. Çdo përpjekje për ta cenuar atë, përbën shkelje të rëndë të të drejtave themelore. Jemi krah studentëve shqiptarë në Maqedoninë e Veriut, në kërkesat e tyre të drejta dhe legjitime.”, ka shkruar Haradinaj në rrjetet sociale. 

 

Autoritetet në Maqedoni përfshi zëvendëskryeministrin e parë Bekim Sali dhe kryeministrin Mickoski, kanë premtuar zgjidhjen e kësaj çështjeje. Ndërsa propozim zgjidhja e përgatitur nga grupi punues, siç ka bërë të ditur kryeministri, do t’i dorëzohet Qeverisë ditën e hënë.