Bota pret paqe, SHBA dhe Irani para marrëveshjes historike

 

“Irani nuk do të ketë një armë bërthamore, as përmes blerjes, as përmes zhvillimit, as në ndonjë formë tjetër. Nuk do të ketë shkëmbim parash. Në kohën e duhur, ne do të marrim të ashtuquajturin "pluhur bërthamor" dhe do ta shkatërrojmë atë. Shpresojmë që ky proces të jetë i shpejtë, i lehtë dhe i qetë. Nëse kjo nuk ndodh, ne kemi një alternativë përfundimtare.”, tha presidenti i SHBA-së Donald Trump.

 

Megjithatë, nënshkrimi mbetet i pasigurt. Teherani ka hedhur poshtë pretendimet se dokumenti do të nënshkruhet brenda 24 orëve, duke thënë se afatet krijojnë tensione. Ndërsa la të hapur mundësinë që kjo të mund të ndodhë në ditët në vijim, zëdhënësi i Ministrisë së Jashtme iraniane Bagheeri tha se "kjo nuk është një marrëveshje përfundimtare, por një memorandum" dhe paralajmëroi se procesi mbetet i paqëndrueshëm. Nga ana tjetër, Garda Revolucionare e Iranit tha se afati kohor është një “provë për ekipin negociator”.

 

“Duke pasur parasysh qëndrimet e qarta të përfaqësuesve iranianë se marrëveshja nuk është finalizuar, duket se negociatorët e vendit tonë janë të vetëdijshëm për këto shtresa të fshehura dhe nuk do të lejojnë një manovër të tillë mediatike dhe ceremoniale. Nga kjo perspektivë, fati i nënshkrimit nuk do të jetë vetëm një provë teknike e përmbajtjes së mirëkuptimit, por edhe një provë e ndershmërisë dhe rezistencës së përfaqësuesve iranianë ndaj presioneve demonstrative.”, thonë nga Garda Revolucionare e Iranit.

 

Ndërkohë, negociatorët e Katarit janë drejtuar për në Iran për të ndihmuar në finalizimin e marrëveshjes. Islamabadi konfirmoi se po përgatitet për nënshkrimin elektronik të dokumentit.

 

“Pakistani po përgatitet për nënshkrimin elektronik të marrëveshjes së paqes, e ndjekur nga bisedimet në nivel teknik javën e ardhshme. Jemi të bindur se kjo marrëveshje historike paqeje do të formojë një themel të fortë për paqe të qëndrueshme.”, deklaroi kryeministri i Pakistanit Shehbaz Sharif.

 

Ndërkohë, grupet e linjës së ashpër po protestojnë në Teheran, duke akuzuar Ministrin Araghchi se po bën lëshime ndaj Uashingtonit. Përballë një marrëveshjeje të mundshme midis Iranit dhe Shteteve të Bashkuara, Izraeli po i shton sulmet e tij ndaj Hezbollahut në Libanin jugor.