Baku – Loe, në Lojërat Evropiane pjesëmarrëse edhe Kosova

Ndër vendet pjesëmarrëse është edhe Shqipëria. Në këtë garë sportive të nivelit evropian, që organizohet për të parën herë, marrin pjesë seleksionet e më se 50 vendeve. 

 

Siç ka njoftuar më herët Komiteti Olimpik i Kosovës, në Baku udhëtuan 19 sportistë nga 9 sporte: xhudo, karate, qitje, mundje, boks, shigjetari, not, çiklizëm dhe tekvando. Kjo garë sportive evropiane po mbahet në periudhën kur Azerbajxhani po ballafaqohet me kritika për gjendjen e të drejtave të njeriut. 

 

Organizata “Human Rights Watch” tha se disa gazetarë nga organizatat kryesore të informacioneve në Evropë nuk janë lejuar të hyjnë në këtë vend për të raportuar nga këto gara. Autoritetet në Baku thonë se ekziston një fushatë e mediave për “deskreditimin” e lojërave.

 

“Human Rights Watch” tha se Lojërat Evropiane, në të cilat marrin pjesë afro 6 mijë sportistë nga i gjithë kontinenti, hapen në “një atmosferë të represionit të paprecedent të qeverisë në periudhën pas-sovjetike”.