Emigrantët ilegalë, edhe mbrëmë protesta në qendrën në Gazi Babë

Dje në një aksion MPB shkatërroi një degë trafikimi ilegal në fshatin Vaksincë, ku u zbuluan 128 emigrantë ilegalë dhe u arrestuan 4 persona, pronarë të shtëpive ku ishin strehuar emigrantët.

 

Policia ka ngritur procedura për veprën “trafikim emigrantësh”.

 

Gjithashtu është kapur edhe një person 68 vjeçar, i cili është kërkuar me fletëarrest për vuajtje të dënimit me burg për vrasje.

 

Gjatë aksionit policia ka konfiskuar edhe armë, municion dhe mjete tjera.

 

Pronarët e objekteve i kanë dhënë me qira objektet në shumë prej 1500 euro në muaj, varësisht nga ajo se për çfarë objekti bëhet fjalë, apo nëse vet i kanë pranuar emigrantët iu kanë marrë nga 5 deri 10 euro vetëm për strehim, pa iu dhënë krevat.

 

Por nuk vuajnë vetëm emigrantët që strehohen privatisht në Maqedoni. Edhe mbrëmë banorët e lagjes së Gazi Babës, ku gjendet Qendra për Pranimin e Azilkërkuesve, janë ankuar për zhurmën që vinte nga kjo qendër ku për të dytën natë me radhë emigrantët ilegalë të strehuar në të protestojnë për stërzgjatjen e procedurave të nxjerrjes së tyre para gjykatësit për të përcaktuar mënyrën e arritjes së tyre në Maqedoni, por mbi të gjitha për kushtet katastrofale në të cilat ata jetojnë në këtë qendër. 

 

Për kushtet në të cilat gjenden emigrantët e strehuar në Shkup, në një press-konferencë sot do të prononcohet edhe avokati i popullit, Ixhet Mehmeti.