Venezuelë, vazhdojnë kërkimet për të mbijetuar

 

“Nuk kemi asnjë dyshim se aty ka një person të gjallë. Ajo po komunikon me ne dhe po kërkon ndihmë, por operacioni i shpëtimit mund të zgjasë edhe më shumë se 14 orë.”, - deklaroi Vagner Leiva nga Kryqi i Kuq i Kosta Rikës. 

 

Ende ka mungesë të makinerive të nevojshme për të hequr rrënojat, për të mësuar fatin e mijëra personave të zhdukur, prandaj vazhdojnë të mbërrijnë ekipe shtesë ndërkombëtare të shpëtimit. Familjarët po gërmojnë me të gjitha mjetet në dispozicion me shpresë për gjetjen e të afërmit e tyre të zhdukur.

 

“Asnjëherë nuk e kemi humbur shpresën. Vazhdojmë të gërmojmë nën rrënoja. Po komunikojmë me tre persona që ndodhen poshtë. Nuk e di nëse ka edhe të tjerë, por trupat e të afërmve tanë nuk janë gjetur ende, prandaj vazhdojmë të shpresojmë se janë gjallë.”, - theksoi i afërmi i një të zhdukuri nga tërmeti, Xhejson Markano. 

 

Tërmeti katastrofal ka thelluar më tej pasojat e krizës së gjatë ekonomike dhe politike, veçanërisht mbi sistemin shëndetësor që tashmë është mbingarkuar. Gjendjen e vështirësojnë edhe më shumë se 12 mijë persona, të cilët janë zhvendosur nga shtëpitë e tyre.

 

“Numri i delegacioneve ndërkombëtare është rritur. Kanë mbërritur 2.624 shpëtimtarë të huaj, 137 qen kërkimi, 49 automjete ndihmëse dhe 84.4 tonë pajisje, ilaçe dhe materiale kirurgjikale.”, - u shpreh kryetari i Asamblesë Kombëtare, Horhe Rodrigez.

 

“Për momentin njerëzit kanë nevojë për kujdes mjekësor, mbështetje dhe inkurajim. Edhe pse shumica e pacientëve janë në gjendje stabile, kemi raste të hiperglikemisë dhe hipertensionit të rëndë për shkak të mungesës së barnave.”, - theksoi mjekja, Luri Salas.

 

Të paktën 1,450 persona janë konfirmuar se kanë vdekur, por numri pritet të rritet pasi rreth 46 mijë persona llogariten të zhdukur.