Republika e Kosovës, shënohet 36-vjetori i deklaratës kushtetuese

 

“Pas 2 korrikut erdhi 7 shtatori, u shpall Kushtetuta e Kaçanikut, pastaj referendumi për pavarësi dhe i gjithë organizimi i viteve të 90-ta. Kosova u përpoq ta mbante veten në këmbë, me institucione që krijoi, me shkollat shtëpi, me universitetin, me jetën politike dhe me qytetarët që nuk pranuan amendamentet e mëhershme dhe dënimin që iu kishte imponuar.”, - theksoi u.d. presidente e Kosovës, Albulena Haxhiu.

 

Haxhiu njëherësh theksoi se rruga politike e viteve të 90-ta mori kuptimin e saj të plotë me Ushtrinë Çlirimtare të Kosovës, e cila  mori mbi vete barrën më të rëndë të historisë sonë të re, luftën për çlirimin e Kosovës. Kryeministri në detyrë, Albin Kurti, vlerësoi se Deklarata Kushtetuese e 2 korrikut të vitit 1990 ishte shprehje e lirisë, por edhe e barazisë. 

 

"Ato vite, në përpjekje për krijimin e Serbisë së Madhe, shteti i Serbisë i nisi katër lufta në Jugosllavi: në Slloveni, në Kroaci, në Bosnje e Hercegovinë dhe në Kosovë. Më 2 korrik 1990, vullneti legjitim politik i shqiptarëve triumfoi mbi dhunën, shtypjen dhe diskriminimin politik të Serbisë në Kosovë. Republika e Kosovës, e shpallur në vitin 1990, ishte e para Republikë e Kosovës, e cila rezultoi të ishte republikë për rezistencë. Njëherë për qëndresë paqësore, e më andej edhe për luftë çlirimtare.", - theksoi kryeministri në detyrë i Kosovës, Albin Kurti. 

 

Ilaz Ramajli, kryetar i delegatëve, që votuan Deklaratën Kushtetuese të 2 korrikut 1990 tha se kur e sheh Kosovën e pavarur bindet se deklarata nuk ishte vetëm akt juridik. 

 

"Është po aq e rëndësishme të kujtojmë se suksesi i punës së Kuvendit të Kosovës atëherë nuk ishte rezultat vetëm i vendimeve të delegatëve. Ai u bë i mundur falë unitetit që ishte krijuar ndër shqiptarët e Kosovës, falë angazhimit të Akademisë së Shkencave dhe të Arteve të Kosovës, si dhe falë kontributit të elitës intelektuale dhe politike të kohës, e cila me vizion, mprehtësi dhe përgjegjësi, ndihmoi në formulimin e platformës politike e juridike mbi të cilën mbështetej veprimtaria e Kuvendit atëherë. E më pas, këtë kuptim ia dha shpirti i rezistencës së këtij populli, sakrifica e Ushtrisë Çlirimtare të Kosovës dhe mbështetja e vendeve mike, e miqve tanë ndërkombëtarë, në veçanti të Shteteve të Bashkuara të Amerikës dhe aleatëve të NATO-s. Të gjitha këto, formojnë hallka të pandashme të historisë sonë të lirisë.", - u shpreh kryetari i delegatëve të 3 korrikut, Ilaz Ramajli. 

 

Ramajli njëherësh bëri të ditur se nga 111 delegatë, që më 2 korrik morën përgjegjësinë historike për ta shpallur Deklaratën Kushtetuese, 50 prej tyre sot nuk janë më në mesin tonë.