Kuvend, nis debati për ribalancin e buxhetit 2026
03.07.2026 15:43
Si do të shpenzohen paratë nga buxheti i shtetit deri në fund të vitit?
Si do të shpenzohen paratë nga buxheti i shtetit deri në fund të vitit? Për këtë nisi debati në Kuvend, ku deputetët filluan shqyrtimin e propozim-ribalancit të Buxhetit për vitin 2026. Me ribalancin, Qeveria propozon rritjen e buxhetit të shtetit me 189 milionë euro, në 6.91 miliardë euro. Shuma për investime kapitale rritet nga 650 milionë eurot fillestare në 748 milionë euro - kryesisht për projekte në infrastrukturën rrugore dhe hekurudhore, por edhe në kujdesin shëndetësor, arsim dhe energji. Ministrja e Financave, Gordana Dimitrieska Koçoska, tha se ribalanci synon të ruajë stabilitetin e financave publike, duke siguruar njëkohësisht më shumë mjete për investime dhe zhvillim ekonomik.
“Me ribalancimin e propozuar të buxhetit, të ardhurat totale rishikohen në 379.5 miliardë denarë. Nga ana e të ardhurave, të ardhurat tatimore mbeten pothuajse në nivelin e planifikuar fillimisht dhe parashikohen në 213.2 miliardë denarë. Të ardhurat jotatimore tregojnë një përmirësim të ndjeshëm dhe rritje me rreth dy miliardë denarë, ndërsa donacionet rriten me rreth 2.7 miliardë denarë.”, - deklaroi ministrja e Financave, Gordana Dimitrieska Koçoska.
LSDM-ja planin e Qeverisë e vlerëson si të pavlerë dhe vështirë të zbatueshëm.
“Në vend që ribalanci të përfaqësojë një korrigjim drejt projeksioneve më realiste dhe të qëndrueshme, krijohet përshtypja se, pavarësisht njohjes së perspektivave më të dobëta makroekonomike, ribalancimi po ndërtohet mbi pritje optimiste për të ardhurat që, në kushte të rritjes së reduktuar ekonomike, inflacionit më të lartë prej 4.5%, një deficiti tregtar më të madh dhe pasigurie të konsiderueshme globale, do të jenë jashtëzakonisht të vështira për t'u arritur.”, - theksoi deputetja e LSDM-së, Sanja Llukarevska.
Deputetët në pushtet presin debat konstruktiv dhe besojnë se propozimi është një bazë e mirë për zhvillimin e ekonomisë vendase.
"Shuma për investime kapitale po rritet me mbi 14%, që është mirë, dhe të gjitha ato fonde që po rriten po shkojnë posaçërisht për projekte specifike. Së dyti, shuma në sektorin e shëndetësisë po rritet ndjeshëm dhe gjëja e tretë që është veçanërisht indikative dhe për të cilën kemi folur vazhdimisht në teori se si duhet të duket një ribalancim i buxhetit është për arsimin, ku ka edhe një rritje të fondeve për ndërtimin e projekteve të reja të infrastrukturës, dhe besoj se kjo është diçka që duhet të jetë një shembull shkollor i një ribalancimi.”, - u shpreh deputeti i VMRO-DPMNE-së, Bojan Stojanoski.
Opozita me mbi 200 amendamente, do të kërkojë korrigjime dhe ripërdorimin e fondeve që do të shpenzohen për nevojat reale të qytetarëve dhe ekonomisë. Sipas Rregullores së Kuvendit, debati në Komisionin për Financim dhe Buxhet mund të zgjasë deri në 10 ditë pune, ndërsa pas përfundimit të tij dokumenti do të procedohet në seancë plenare, ku deputetët do të votojnë për miratimin e ribalancit.
SANIJE DURAKU