ShBA-ja bombardoi disa zona në Ngushticën e Hormuzit, Irani përgjigjet me sulme ndaj anijeve

 

Forcat amerikane ndërmorën sulme ajrore ndaj disa objektivave në Iran, duke goditur zona strategjike si Bandar Abas, Shirik, Jask dhe Bushehr. Sipas Komandës Qendrore të ShBA-së (CENTCOM), objektivat përfshinin instalime ushtarake dhe sisteme që, sipas Uashingtonit, përdoren për sulme ndaj anijeve tregtare në Ngushticën e Hormuzit.

 

Në kundërpërgjigje, Irani njoftoi se nisi një valë sulmesh me raketa balistike dhe dronë ndaj bazave amerikane në rajon. Sipas raportimeve, raketa me rreze të shkurtër veprimi u lëshuan drejt forcave amerikane në Bahrein, ku ndodhet Flota e Pestë e ShBA-së. Sirenat e alarmit u dëgjuan në Bahrein dhe në Jordani, ndërsa autoritetet jordaneze mbyllën përkohësisht aeroportin e Amanit si masë sigurie. 

 

Ndërkohë, agjencia shtetërore iraniane IRNA raportoi se një person u vra dhe katër të tjerë u plagosën pas një sulmi ajror amerikan në qytetin Mashhad. Zyrtarët iranianë thanë se u godit një stacion pompimi për ujitjen e tokave bujqësore, ndërsa burime të tjera pretendojnë se objektivi ishte një komandant i lartë i Gardës Revolucionare në një qendër komanduese nëntokësore. 

 

Ngushtica e Hormuzit mbetet një nga rrugët detare më të rëndësishme në botë për transportin e naftës, ndërsa përshkallëzimi i konfliktit po shton frikën për ndërprerje të furnizimeve globale dhe destabilizim të mëtejshëm të rajonit.