Mexhiti: Çairi do ta ketë festivalin e tij “Çarshia”

 

“Sot kemi kënaqësinë të prezantojmë edicionin e parë të Festivalit Ndërkombëtar të Muzikës “Çarshia”, një nismë e Komunës së Çairit që synon të krijojë një traditë të re artistike dhe ta vendosë Shkupin edhe më fuqishëm në hartën kulturore të rajonit. Nga 23 deri më 26 korrik, Suli Ani dhe Kurshumli Ani do të shndërrohen në skena ku muzika klasike do të takohet me historinë e Çarshisë së Vjetër, dhe ambiciet tona shkojnë përtej katër ditëve të festivalit, sepse në duam të ndërtojmë një institucion kulturor që do të rritet në çdo edicion dhe do të tërheqë artistë nga vendet e ndryshme dhe do ta bëjë Shkupin një vendtakim të përditshëm të artistëve dhe dashamirët e muzikës klasike nga rajoni dhe më gjerë.”, - deklaroi kryetari i Komunës së Çairit, Izet Mexhiti.

 

 

Sipas Mexhitit, festivali që vjen pas panairit të librit, ka një mision që shkon përtej skendës artistike, krijon hapësira ku trashëgimia takohet me krijimtarinë bashkëkohore, ndërsa identiteti ynë kulturor e kombëtar pasurohet dhe përcillet tek brezat që vijnë. I pyetur rreth mbikalimit në Bit Pazar, Mexhiti tha se po shqyrtohen dy mundësi. 

 

“Jemi duke shqyrtuar dy opsione, ku opsioni më i mundshëm është vendosja e semaforit aty, kurse opsioni tjetër është rrënimi i urrës meqë nuk është në funksion të plotë dhe nuk po shfrytëzohet nga qytetarët. Opsion mund të jetë edhe prishja e urës, me qëllim për ta rregulluar vendkalimin aty.”, - theksoi kryetari i Komunës së Çairit, Izet Mexhiti.

 

Ky vendkalim fillimisht ishte mbyllur, por me kërkesë të tregtarëve, u vendos që përsëri të hapet.