Botë
Trump-i rikthen përplasjet me Kinën, Pekini hedh poshtë akuzat
17.07.2026 13:33
Marrëdhëniet mes Shteteve të Bashkuara dhe Kinës janë përballur me tensione të reja....
Marrëdhëniet mes Shteteve të Bashkuara dhe Kinës janë përballur me tensione të reja, pasi presidenti amerikan Donald Trump akuzoi Pekinin për ndërhyrje në zgjedhjet presidenciale amerikane të vitit 2020. Trump deklaroi se Kina ka përdorur mjete të ndryshme për të ndikuar në procesin zgjedhor, pa paraqitur prova të reja publike për këto pretendime. Autoritetet kineze reaguan menjëherë, duke i cilësuar akuzat si të pabazuara dhe një përpjekje për të dëmtuar marrëdhëniet dypalëshe. Ministria e Jashtme e Kinës theksoi se Pekini nuk ndërhyn në punët e brendshme të vendeve të tjera dhe bëri thirrje për ruajtjen e dialogut.
Deklaratat e fundit vijnë në një periudhë kur të dy vendet po përpiqeshin të ruanin armëpushimin tregtar të arritur pas mosmarrëveshjeve mbi tarifat doganore dhe tregtinë. Analistët paralajmërojnë se retorika e re mund të ndikojë negativisht në marrëdhëniet politike dhe ekonomike mes Uashingtonit dhe Pekinit.
"Kina u përpoq të ndërhynte në zgjedhjet tona. Ne nuk do të lejojmë që kjo të kalojë pa u përballur.", - deklaroi presidenti i ShBA-së, Donald Trump.
“Këto pretendime janë një shpifje dashakeqe. Kina nuk ka ndërhyrë dhe nuk do të ndërhyjë kurrë në zgjedhjet e ndonjë vendi.", - theksuan nga Ministria e Jashtme e Kinës.
Megjithëse deri më tani nuk janë njoftuar masa të reja ekonomike, deklaratat e ndërsjella kanë shtuar pasigurinë në marrëdhëniet mes dy fuqive botërore, ndërsa vëmendja mbetet te zhvillimet diplomatike në javët në vijim.
MERITA GASHI