Front i ri në det? Irani paralajmërohet se mund të aktivizojë Huthët në Bab el-Mandab

Tensionet në Gjirin Persik po zgjerojnë shqetësimet për transportin ndërkombëtar detar. Përveç Ngushticës së Hormuzit, vëmendja tashmë është zhvendosur te Bab el-Mandab, një nga kalimet më të rëndësishme detare në botë që lidh Detin e Kuq me Gjirin e Adenit dhe Kanalin e Suezit.

 

Sipas raportimeve të Reuters, Irani u ka kërkuar Huthëve në Jemen të jenë të përgatitur për aktivizimin e një fronti të dytë detar në rast të sulmeve amerikane ndaj objekteve energjetike iraniane.

 

Një përshkallëzim në këtë zonë do të vendoste nën presion dy nga rrugët më të rëndësishme për transportin e energjisë në botë. Pasojat mund të prekin jo vetëm furnizimin me naftë dhe gaz, por edhe tregtinë globale, çmimet e transportit dhe kostot e sigurimit të anijeve.

 

Sipas burimeve të cituara nga Reuters, autoritetet iraniane kanë diskutuar skenarë të ndryshëm për përshkallëzimin e situatës, ndërsa Huthëve u janë përcjellë udhëzime për të qenë gati. Organizata thuhet se ka vendosur raketa dhe dronë në pozicione që mund të ndikojnë në lëvizjen e anijeve në Bab el-Mandab.

 

 

Rëndësia strategjike e Detit të Kuq është rritur pas vështirësive në Ngushticën e Hormuzit. Arabia Saudite ka zhvendosur një pjesë të madhe të eksporteve të saj drejt portit të Yanbusë, duke përdorur tubacione që anashkalojnë Gjirin Persik.

 

Aktualisht, rreth 70% e eksporteve energjetike saudite kalojnë përmes kësaj rruge, ndërsa Deti i Kuq përbën një korridor të rëndësishëm për furnizimin global me energji.

 

Çdo sulm ndaj anijeve tregtare ose infrastrukturës energjetike mund të ndikojë në rritjen e tarifave të transportit, sigurimeve dhe çmimeve të energjisë.

 

 

Ndërkohë, në Ngushticën e Hormuzit trafiku detar ka pësuar rënie për shkak të pasigurisë së shtuar. Të dhënat e monitorimit të lundrimit tregojnë një ulje të numrit të kalimeve të anijeve, pasi operatorët po tregohen më të kujdesshëm për shkak të rrezikut të përshkallëzimit.

 

Kompanitë e sigurimeve kanë rritur primet për rrezikun e luftës, ndërsa disa operatorë po shqyrtojnë ndryshimin e itinerareve për të shmangur zonat e rrezikshme.

 

Nëse tensionet shtrihen edhe në Bab el-Mandab, ekonomia globale mund të përballet me një presion të ri, pasi dy nga korridoret më të rëndësishme të transportit të energjisë do të viheshin njëkohësisht në rrezik.