Përshkallëzohen sulmet Rusi-Ukrainë, të paktën 14 të vrarë në të dyja anët e kufirit

 

Autoritetet ruse njoftuan se gjashtë persona humbën jetën në rajonin kufitar të Belgorodit si pasojë e sulmeve ukrainase me dronë. Sipas guvernatorit rajonal, Alexander Shuvaev, pesë civilë, katër gra dhe një adoleshent, u vranë kur një dron goditi një autobus në qytetin Shebekino, pranë kufirit me Ukrainën. Nga sulmi mbetën të plagosur edhe 23 persona, tre prej të cilëve ndodhen në gjendje kritike. Më vonë, Shuvaev raportoi se një tjetër sulm ukrainas goditi një lavazh automjetesh në qytetin e Belgorodit, duke shkaktuar një viktimë dhe dhjetë të plagosur. 

 

Ndërkohë, në Ukrainë, bombardimet ruse kanë shkaktuar të paktën tetë viktima dhe dhjetëra të plagosur në disa rajone të vendit. Në Odesa, tre persona u vranë dhe tetë të tjerë u plagosën pasi një sulm goditi një ndërtesë kompanie. Guvernatori rajonal Oleh Kipper publikoi pamje nga vendngjarja që tregonin automjete të shkatërruara dhe zjarrfikësit në operacion. 

 

Ndërsa luftimet vijojnë me intensitet në të dyja anët e kufirit, përpjekjet diplomatike për arritjen e një marrëveshjeje paqeje mbeten të bllokuara, duke e lënë fundin e konfliktit ende larg.