Situata në Gostivar, vazhdojnë përplasjet e partive politike

 

“Kur Valbon Limani thotë se nuk ndjen përgjegjësi për skandalin e ujit në Gostivar, LSD-ja, BDI-ja dhe Taravari heshtin. Të njëjtët njerëz që flasin çdo ditë për llogaridhënie dhe kërkojnë dorëheqje, sot nuk kërkojnë as falje, as përgjegjësi politike apo morale nga kandidati i tyre, Valbon Limani.”, - deklaroi Brane Petrushevski nga VMRO-DPMNE.

 

Kanë reaguar nga LSDM-ja. Sipas tyre, institucionet dhe sistemi dështuan plotësisht në mbrojtjen e shëndetit publik dhe për këtë duhet të ketë përgjegjësi. 

 

“Të gjitha institucionet shëndetësore dështuan; ky është një fakt. Pse, kur numri i pacientëve filloi të rritej ndjeshëm, askush nuk e hetoi shkakun në kohën e duhur? Në vend të një reagimi të shpejtë, koordinimit urgjent, publikimit të rezultateve të analizave të ujit dhe menaxhimit efektiv, ajo që pasoi ishte kaosi dhe një kolaps i plotë institucional.”, - theksoi nënkryetarja e LSDM-së, Jovana Trençevska.

 

BDI-ja shpreh shqetësim për ndotjen e ujit dhe rrezikun serioz që kjo situatë paraqet për shëndetin e qytetarëve. Sipas tyre, “institucionet kompetente duhet të veprojnë menjëherë, me përgjegjësi dhe transparencë të plotë, për të përcaktuar burimin e kontaminimit, përgjegjësinë institucionale dhe për të sqaruar nëse janë ndërmarrë me kohë të gjitha masat e nevojshme për mbrojtjen e qytetarëve.”.

 

Ndërsa, ministri i Mjedisit Jetësor dhe Planifikimit Hapësinor, Muhamet Hoxha, ka deklaruar se VLEN-i dhe Qeveria u kanë treguar qytetarëve të Gostivarit se nuk janë të vetëm. Nga ana tjetër, Aleanca për Shqiptarët e Arben Taravarit në një komunikatë ka vlerësuar se situata është në përmirësim dhe në proces të stabilizimit. 

 

“Nuk duhet të shpejtojmë me gjykime, etiketime apo akuza pa përfunduar puna profesionale e institucioneve. Shtabi i Krizës është duke kryer detyrat e tij, ndërsa kryetari i Komunës së Gostivarit ka vënë në dispozicion të gjitha kapacitetet komunale për menaxhimin e situatës dhe për t’u dalë në ndihmë qytetarëve.”, thuhet në komunikatën e ASh-së. 

 

Në reagimin e Lidhjes Shqiptare thuhet se Sela u kërkon ndjesë qytetarëve për këtë vendim, duke vlerësuar se ata që morën besimin e qytetarëve, për interesa personale dhe për përfitime politike, e sollën qytetin në situatën aktuale.

 

“Ziadin Sela shfrytëzon rastin t’u kërkojë ndjesë qytetarëve të Gostivarit që në të kaluarën ua besoi fatin e Gostivarit njerëzve të gabuar, të cilët për karrierë dhe për rejting politik janë të gatshëm të bëjnë atë që i bënë një qyteti të tërë.”, thuhet në deklaratën e Lidhjes Shqiptare.

 

Uji në Gostivar do të lejohet për konsum vetëm atëherë kur të jetë absolutisht i sigurt, njoftojnë autoritetet.