Stuhia godet edhe Shqipërinë, dy viktima, të lënduar dhe dëme materiale

 

Në Himarë, Bashkim Boçi, elektricist i OSSh-së, humbi jetën gjatë punës për rikthimin e energjisë elektrike në zonën e Potamit.

 

Rreth orës 03:00, teksa po ngjitej në një shtyllë për të riparuar defektin, u këput rripi i sigurisë dhe ai ra nga 9 metra lartësi, duke ngritur pikëpyetje serioze mbi kushtet e sigurisë në punë.

 

Në Ksamil, stuhia e gjeti në det të trazuar peshkatarin Mihal Zoi. Varka e tij u përmbys, ndërsa trupi i pajetë u gjet pranë tre ishujve.

 

Gjatë stuhisë, Policia Kufitare e Vlorës ndërhyri për të shpëtuar qytetarë që ndodheshin në rrezik për shkak të dallgëve, nga Karaburuni deri në Ksamil.

 

Në Sarandë, era e fortë rrëzoi dhjetëra pemë, të cilat dëmtuan automjete. Tre persona morën ndihmë mjekësore pasi u lënduan nga xhamat e thyer dhe degët e pemëve.

 

Edhe Vlora u përfshi nga stuhia. Në Lungomare u rrëzuan pemë që dëmtuan fasadat e disa lokaleve, ndërsa në disa zona vijon ende mungesa e energjisë elektrike.

 

Kapiteneria e Portit të Vlorës, ajo e Sarandës dhe Agjencia Kombëtare e Mbrojtjes Civile nuk kishin lëshuar njoftime paralajmëruese për përkeqësimin e motit.