Gostivari dhe Krusheva ende me shqetësime për ujin, Klekovski: Rastet në rënie, epidemia po hyn në fazën e shuarjes

 

“Sot kemi 80 raste të reja të raportuara, që është dy herë më pak krahasuar me shifrat e mëparshme, gjë që tregon qartë se jemi në një trend rënës. Numri i përgjithshëm i të prekurve është rreth 4.000. Deri më tani janë pranuar rreth 750 raportime për sëmundje ngjitëse, ndërsa janë intervistuar epidemiologjikisht 490 persona. Mund të them se epidemia po hyn në fazën e shuarjes dhe tani fillon faza e analizës së plotë epidemiologjike për të përcaktuar kronologjinë e ngjarjeve. Tashmë kemi mbledhur informacion të mjaftueshëm nga puna që epidemiologët kanë kryer në terren.”, u shpreh ministri i Shëndetësisë, Sasho Klekovski.

 

Nga ana tjetër Gostivari po vazhdon të përballet me pasojat e ndotjes së ujit të pijshëm. Qytetarët, të shqetësuar, thonë se frikësohen se uji i ndotur mund të ndikojë edhe në sigurinë e ushqimit, pasi me të lahen frutat dhe perimet. Ata thonë se produktet ushqimore i blejnë kryesisht në markete dhe se para konsumimit i lajnë me ujë të pastër.

 

“Fruta dhe perime blejmë nga marketet.”, u shpreh një qytetar.

 

“Jemi të frikësuar nga uji i ndotur.”, tha një qytetar.

 

“Këtu blejmë ujë për pije, por për pastrim nuk kemi.”, theksoi një qytetar.

 

“Blejmë ujë këtu, madje edhe për pastrim përdorim ujin që e blejmë.”, u shpreh një qytetare.

 

Ndërkohë, mjekët u bëjnë thirrje qytetarëve të Gostivarit të mos krijojnë panik, por të tregojnë kujdes dhe të zbatojnë rekomandimet e autoriteteve shëndetësore.

 

“Në këtë moment nuk ka nevojë për përhapje paniku, nevojitet vetëm kujdes. E kuptoj shqetësimin e qytetarëve të komunës së Gostivarit, veçanërisht të prindërve të fëmijëve të vegjël. Megjithatë, është e rëndësishme që ata të ndjekin rekomandimet e autoriteteve shëndetësore dhe, nëse vërejnë ndonjë simptomë specifike, të reagojnë menjëherë. Por nuk ka asnjë arsye për shqetësim të shtuar apo për panik më të madh.”, u shpreh mjekja Karolina Ristovska.

 

Edhe banorët e Krushevës vazhdojnë të sigurojnë ujë për pije dhe përdorim shtëpiak në mënyra alternative, pasi ndalimi i përdorimit të ujit nga ujësjellësi i qytetit mbetet në fuqi për shkak të papërshtatshmërisë bakteriologjike. Qendra e Shëndetit Publik në Prilep po analizon mostrat e ujit. Edhe pse mostra e parë ka rezultuar e rregullt, ndalimi do të hiqet vetëm pasi të konfirmohen rezultatet e tre mostrave të njëpasnjëshme, që priten më së hershmi të martën.

 

Ndërkohë, vazhdon hetimi për burimin e ndotjes së lumit Lepenc. Janë marrë mostra për analiza, ndërsa Inspektorati i Mjedisit ka nisur kontrolle ndaj subjekteve përgjatë lumit për të identifikuar shkaktarin e ndotjes.