Shkupi përkujton tragjedinë, 63 vjet nga tërmeti katastrofal

 

 

Në kuadër të shënimit të përvjetorit në Çarshinë e Vjetër të Shkupit është zbuluar një pllakë përkujtimore kushtuar urbanistit polak Adolf Ciborowski, për kontributin e tij në ruajtjen e kësaj zone historike pas tërmetit të vitit 1963. Kryetari i Komunës së Çairit, Izet Mexhiti, tha se Ciborowski ishte ndër ekspertët ndërkombëtarë që mbështetën ruajtjen e Çarshisë së Vjetër si pjesë të identitetit urban dhe kulturor të qytetit.

 

“Adolf Ciborowski ishte një prej njerëzve që kuptoi se një qytet nuk ndërtohet vetëm duke krijuar të renë, por edhe duke ruajtur atë që e bën të veçantë. Kontributi i tij në ruajtjen e Çarshisë së Vjetër mbetet pjesë e historisë së Shkupit, ndërsa kjo pllakë përkujtimore është shprehje e mirënjohjes sonë për vizionin dhe përkushtimin e tij.”, u shpreh kryetari i Komunës së Çairit, Izet Mexhiti.

 

Tërmeti i Shkupit i vitit 1963 njihet si një nga tragjeditë më të mëdha që kanë ndodhur në historinë e qytetit, por njëkohësisht edhe si një mundësi që bota të tregojë solidaritetin e saj dhe të ndihmojë në rimëkëmbjen e komunitetit.