Vrasja në lagjen Gjorçe Petrov, i akuzuari: nuk e kisha për qëllim ta vras Angel Petkovskin

Ai para trupit gjykues pohoi se atë ditë me vete ka pasur vetëm telefonin celular, cigaret dhe pak të holla. Eshtrefi, i cili në kohën e kryerjes së aktit ka pasur 18 vjet, sqaroi se nuk ka pasur thikë, ndërsa habit fakti se si e njëjta u gjet aty.

Pas tentimit për të marrë biçikletën në oborrin e familjes Petkovski, ai është drejtuar rrugës kah Spitali Evropian i Syve, që çon në Saraj, i bindur se askush nuk e ndjek pas. Në arritje tek ura afër spitalit shef Angel Petkovskin, i cili të akuzuarin e ka kapur për fyti dhe me britma ka kërkuar të tregojë se kush është dhe më pas e ka goditur. Ndërkohë, është paraqitur edhe i ati i Angel Petkovskit, i cili ka filluar ta qëllojë me dru të akuzuarin, i cili është shtrirë për toke.

“Të qëlluarat nuk kishin të ndalur, pashë një thikë dhe nuk dija më se kë po qëlloja”- është shprehur para trupit gjykues i akuzuari, Naser Eshtrefi.

Naseri atëherë u largua nga vendi i ngjarjes dhe u paraqit në stacionin policor. Po gjatë këtij procesi gjyqësor, me herët u shpalosën edhe video-incizime nga kamerat e sigurisë të Spitalit Evropian të Syve.

Aty vërehej se Angel Petkovski së bashku me babanë e tij pritën të akuzuarin, i cili pak më parë kishte tentuar t’u vjedhë biçikletën. Pala mbrojtëse në këtë rast ka dëshmuar se i akuzuari pas ngjarjes ka pasur lëndime të rënda fizike dhe gjendje të vështirë psikike. Mbrojtja në këtë rast disa herë ka deklaruar se i akuzuari aktin e ka kryer në vetëmbrojtje dhe në gjendje afekti. (Florije Beluli-Kamberi, TVM2)