Nuland viziton Maqedoninë, Zaev: Nulland mund të përfshihet në bisedime; KE për krizën politike: Junker qëndron pas komisarit Hahn në bisedime

Po ashtu lideri i LSDM-së, Zaev, konfirmon ardhjen në Maqedoni të ndihmëssekretares së shtetit amerikan për Evropë dhe Azi, Viktorija Nulland.

 

Sipas Zaevit, nuk do të përjashtohej mundësia që Nulland të kyçet në procesin e bisedimeve pas dështimit të përpjekjeve për arritje të marrëveshjes me ndërmjetësim të Brukselit.  

 

“Zëvendëssekretarja e  departamentit të shtetit po vjen në rajon, ndërsa do të vizitojë edhe Maqedoninë. Kjo vizitë është paralajmëruar para disa muajve. Ne nuk përjashtojmë mundësinë e përfshirjes së saj në procesin e bisedimeve, nëse ka qëllime të mira. Pres që nëse brenda 10 ditëve arrihet vullnet i mirë, të vazhdojmë me bisedimet, nëse jo atëherë nuk ka nevojë që të vazhdojmë me negociatat”- deklaroi lideri i LSDM-së, Zoran Zaev.

 

Ndërkohë, Margaritis Shinas, zëdhënës i Komisionit Evropian, konfirmoi se kryetari i KE¬së, Zhan Klod Junker, qëndron pas komisarit për negociata për zgjerim, Johanes Hahn, në raport të përpjekjeve të tij dhe paanshmërisë gjatë ndërmjetësimit në bisedat për zgjidhjen e krizës politike në Maqedoni. 

 

Në pyetjen se si Komisioni Evropian i komenton sulmet e LSDM-së, se Han ka qenë i anshëm në interes të VMRO-së dhe kryeministrit, Nikolla Gruevski, dhe madje për atë komisari austriak nuk ka përkrahje në Eurokomision, si dhe të disa vendeve anëtare të Unionit, zëdhënësi i KE-së dha këtë përgjigje: “kryetari Junker qëndron pas të gjithë 27 anëtarëve të kolegjit të tij”.

 

Ndërkohë, zëdhënësja e komisarit Hahn, Maja Kocijançiç, në thirrjen e Zaevit që kriza të zgjidhet për dhjetë ditë përndryshe do të radikalizohen protestat e LSDM-së, potencoi se Brukseli zyrtar pret që liderët politik në vend të sillen në mënyrë të përgjegjshme ndaj qytetarëve.

 

Sipas informatave të KE-së, këtë javë pritet të vazhdojë dialogu i katërshes së liderëve politik me ndërmjetësim të ambasadorëve të BE-së dhe ShBA-së, Aivo Orav dhe Xhes Bejli.