Moti i keq në Britaninë e Madhe: Përmbytjet shkaktojnë probleme në aeroportin Heathrow

Aeroporti Heathrow në Londër ka paralajmëruar për pengesa në qarkullim pas përmbytjeve që kanë prekur zonën qendrore të aeroportit.

Aksesi në Terminalet 2 dhe 3 është kufizuar, pasi uji ka përfshirë zonën qendrore të aeroportit. Për pasagjerët që udhëtojnë drejt ose larg këtyre terminaleve, lëvizja me automjete në rrugë aktualisht nuk është e mundur.

Autoritetet e aeroportit u kanë bërë thirrje pasagjerëve që të përdorin trenat dhe metronë, duke shmangur udhëtimin me automjete.

“Ekipet tona po punojnë për ta zgjidhur situatën sa më shpejt të jetë e mundur. Kërkojmë ndjesë për çdo shqetësim të shkaktuar”, deklaroi aeroporti në orët e para të së shtunës.

Problemet vijnë në një prej periudhave më të ngarkuara të vitit për Heathrow, pasi në Mbretërinë e Bashkuar kanë nisur pushimet verore të shkollave.

Sipas aeroportit, 19 korriku ishte dita më e ngarkuar e vitit deri tani, me rreth 267 mijë pasagjerë që kaluan nëpër Heathrow, ndërsa shumë shkolla nisën pushimet verore.

Heathrow është përballur edhe më herët me probleme në transportin hekurudhor. Shërbimet e trenave u ndërprenë pas një rrjedhjeje uji, e cila detyroi mbylljen e një tuneli.

Autoritetet vijojnë punën për normalizimin e situatës dhe rikthimin e aksesit të plotë në zonat e prekura.