ShBA–Iran, skadon afati 60-ditor, marrëveshja larg

 

 

 

“Qëllimi numër një është dhe gjithmonë do të jetë që Irani të mos ketë, në asnjë mënyrë, formë apo rrethanë, një armë bërthamore”, deklaroi Trump.

 

 

Trump ka kërcënuar gjithashtu me veprime ushtarake kundër Omanit nëse ai ndërhyn në negociatat mes SHBA-së dhe Iranit.

 

“Nëse Omani pengon, do t’i bombardojmë pa mëshirë”, tha Trump, duke iu referuar rolit të Omanit në negociatat për Iranin dhe Ngushticën e Hormuzit.

 

Zëdhënësi i Ministrisë së Jashtme iraniane, Esmaeil Baghaei, e cilësoi afatin 60-ditor si të parëndësishëm. Sipas tij, memorandumi i 18 qershorit parashikonte 60 ditë për diskutime mbi heqjen e sanksioneve dhe programin bërthamor, por jo një afat të detyrueshëm për arritjen e marrëveshjes.

 

“Në tekstin e memorandumit nuk ka asnjë pikë që përcakton një afat 60-ditor dhe Republika Islamike e Iranit nuk i formulon kurrë politikat e saj nën presion, ultimatume apo kufizime kohore”, deklaroi zëdhënësi i Ministrisë së Jashtme Iraniane, Esmaeil Baghaei.

 

Baghaei akuzoi SHBA-në për shkelje të memorandumit, duke thënë se pengesa kryesore për dialogun është qëndrimi i Uashingtonit.

 

Memorandumi i qershorit parashikonte ndërprerjen e operacioneve ushtarake dhe 60 ditë negociata për përfundimin e konfliktit dhe arritjen e një marrëveshjeje për programin bërthamor iranian.

 

Parashikohej gjithashtu rihapja e Ngushticës së Hormuzit, një prej rrugëve më të rëndësishme të transportit të naftës dhe gazit në botë.

 

Formalisht, afati mund të zgjatet nëse Uashingtoni dhe Teherani bien dakord. Por deri tani nuk ka marrëveshje as për zgjatjen e afatit, ndërsa çështjet kryesore, Ngushtica e Hormuzit, bllokada amerikane dhe programi bërthamor iranian mbeten të pazgjidhura.