Rriten tensionet në Lindjen e Mesme, Trump nuk tërhiqet: Irani nuk do të ketë armë bërthamore

 

“Ata duan të arrijnë një marrëveshje, por nuk do ta arrijnë marrëveshjen që unë e konsideroj të nevojshme. Irani nuk duhet të ketë armë bërthamore dhe nuk do t’i ketë.”, tha presidenti i SHBA-së, Donald Trump.

 

Teherani nuk e konsideron skadimin e afatit si fund të marrëveshjes, duke thënë se ai ishte paraparë për negociata dhe se SHBA-ja ka shkelur detyrimet. Irani refuzon ultimatume dhe paralajmëron reagim ushtarak nëse diplomacia dështon. Ndërkohë, me Omanin është arritur marrëveshje për transitin përmes ngushticës së Hormuzit.

 

“Janë ndërmarrë përgatitjet dhe masat e nevojshme paraprake, përfshirë edhe për mundësinë që SHBA-ja të vazhdojë me veprimet e saj dashakeqe kundër Iranit.”, u shpreh zëdhënësi i Ministrisë së Punëve të Jashtme të Iranit, Esmaeil Baghai.

 

Omani, ndërkohë, u vu në shënjestër të kërcënimeve nga Trumpi, i cili deklaroi se Uashingtoni, do të merret lehtësisht“ me vendin nëse ai pengon procesin. Tensionet u rritën më tej pasi një anije u godit nga një raketë në ngushticën e Hormuzit, ku humbi jetën një anëtar i ekuipazhit. OKB-ja u bëri thirrje Uashingtonit dhe Teheranit që të rifillojnë negociatat dhe të shmangin veprimet ushtarake.

 

“Nuk ka zgjidhje ushtarake për këtë konflikt. I bëjmë thirrje Iranit dhe SHBA-së që sa më shpejt të rifillojnë negociatat për një zgjidhje paqësore dhe të qëndrueshme, të shmangin veprimet ushtarake dhe të ulin retorikën e ashpër.”, u shpreh zëdhënësi i OKB-së, Stefan Duxharik.

 

Përpjekjet diplomatike nuk po sjellin qetësim as në Gazë. Dështoi përpjekja e Uashingtonit për të arritur përparim drejt një armëpushimi pas takimeve të Kushnerit me Hamasin dhe Netanyahun. SHBA-ja kërkon çarmatimin e Hamasit, ndërsa Izraeli këmbëngul për garanci të sigurisë.

 

“Jemi të përkushtuar për rindërtimin e Gazës, por nuk do të lejojmë që ajo të rindërtohet derisa të realizohet demilitarizimi. Përparim mund të ketë tashmë gjatë 30 ditëve të ardhshme, por na nevojitet bashkëpunimi i të dyja palëve.”, tha i dërguari i posaçëm i SHBA-së për paqe, Jared Kushner.

 

Ndërsa përpjekjet diplomatike vazhdojnë, sulmet dhe përgatitjet ushtarake nuk po ndalen. Pentagoni nënshkroi një kontratë prej 22.9 miliardë dollarësh për përshpejtimin e prodhimit të raketave „Tomahawk“, gjë që e forcon edhe më tej përshtypjen për përgatitje për një konfrontim afatgjatë.