ShBA-ja ashpërson presionin ndaj Iranit, Kina kundërshton sanksionet amerikane

 

“Kemi një bllokadë dhe do të kemi sanksionet më të ashpra në histori. Do ta rrënojmë ekonominë e regjimit. Kjo do ta kufizojë aftësinë e tij për të financuar ushtrinë. Kjo do të funksionojë në Iran dhe ne do ta shkatërrojmë këtë regjim“, deklaroi sekretari i thesarit të SHBA-së, Scott Bessent.

 

Ministria e Jashtme e Kinës hodhi poshtë kërcënimet e Trumpit për „luftë ekonomike“ kundër shteteve që tregtojnë me Iranin, duke vlerësuar se një qasje e tillë nuk do të kontribuojë në zgjidhjen e tensioneve në Lindjen e Mesme.                   

 

“Kina vlerëson se mjetet ushtarake, sanksionet dhe presioni nuk do të ndihmojnë në zgjidhjen e problemit. Ato vetëm do t’i përkeqësojnë tensionet dhe do ta përshkallëzojnë situatën, gjë që nuk është në interesin e askujt. Ne kundërshtojmë sanksionet e njëanshme dhe u bëjmë thirrje të gjitha palëve relevante që ta zgjidhin problemin përmes mjeteve politike dhe diplomatike“, u shpreh zëdhënësi i ministrisë së jashtme të Kinës, Lin Jian.

 

Ndërkohë, trafiku i reduktuar përmes Ngushticës së Hormuzit po rrit shqetësimet për tregjet e energjisë. Katari njoftoi për përpjekje diplomatike për normalizimin e lundrimit.          

“Katari po punon për të gjetur mënyra diplomatike për kthimin e lundrimit në rrjedhë normale dhe shpresojmë se kjo do të jetë një hap pozitiv drejt qetësimit të plotë të krizës. Gjithashtu, është e rëndësishme të kujtohet se liria e lundrimit duhet të garantohet dhe rrugët detare nuk duhet të jenë peng i asnjë lloj shantazhi politik“, theksoi kryeministri i Katarit, Mohamed Bin Abdulrahman Al-Thani.

 

Ndërkohë Huthët raportuan sulme të reja ndaj objektivave në Arabinë Saudite, derisa SHBA-ja vendosi sanksione ndaj personave të lidhur me rrjetin financiar të Hezbollahut. Uashingtoni ndërkohë po e forcon praninë ushtarake në rajon.