Rusia sulmon me dronë Krivi Rih, 16 të vdekur dhe mbi 130 të plagosur, mes tyre edhe fëmijë

 

“Pas meje pati një shpërthim. Forca e shpërthimit më hodhi prapa dhe rashë në gjunjë, ndërsa më pas disi arrita të shpëtoja. Kam prerje të dukshme në disa pjesë të trupit.”, u shpreh Tatjana Hivrenko, grua e plagosur.

 

“Nuk ka pacientë me dëmtime vetëm në një organ, si për shembull në gjymtyrë, apo vetëm me traumë të trurit. Të gjithë pacientët e pranuar, për fat të keq, kanë dëmtime të shumta dhe të rënda.”, u shpreh Alena Klimoviç, drejtoreshë e spitalit.

 

Krivi Rih, vendi ku ndodhi sulmi, është qyteti i lindjes së presidentit ukrainas Zelenski, i cili premton se vendi i tij do të përgjigjet.

 

“Ky sulm frikacak është absolutisht një krim i kryer nga rusët. Ata nuk janë asgjë tjetër veçse përbindësha dhe patjetër që do të përgjigjemi. Është thelbësore të kemi gjithçka që na nevojitet për të mbrojtur jetët. Është e rëndësishme që bota të mos heshtë për të gjitha këto. Kjo luftë ruse duhet të përfundojë dhe bota duhet të na ndihmojë ta arrijmë këtë.”, u shpreh presidenti i Ukrainës, Volodimir Zelenski.

 

Ndërkohë, Bashkimi Evropian ka konfirmuar mbështetjen e tij për sovranitetin, pavarësinë dhe integritetin territorial të Ukrainës, në prag të 35-vjetorit të pavarësisë së saj, i cili do të shënohet më 24 gusht.