Shkupi shënon 10-vjetorin e kanonizimit të Shën Nënë Terezës

 

Nënë Tereza, e lindur më 26 gusht 1910 në Shkup me emrin Anjezë Gonxhe Bojaxhiu, ia kushtoi jetën shërbimit ndaj të varfërve, të sëmurëve dhe njerëzve të braktisur. Në vitin 1950 themeloi Misionaret e Bamirësisë në Kalkutë, duke krijuar një rrjet institucionesh humanitare që u shtri në shumë vende të botës.

 

Për veprën e saj, ajo u nderua me Çmimin Nobel për Paqe në vitin 1979. Nënë Tereza ndërroi jetë më 5 shtator 1997, ndërsa në vitin 2016 u shpall shenjtore nga Kisha Katolike.

 

Me rastin e 10-vjetorit të kanonizimit të saj, nga sot deri më 5 shtator në Shkup do të mbahet manifestimi "Ditët e Nënës Terezë të shenjtë" me program shpirtëror, kulturor dhe humanitar.

 

Hapja është caktuar për sonte te Porta Maqedonia, ku do të drejtohet me fjalim monsinjor dr. Kiro Stojanov nga Kisha Katolike në Shkup, ndërsa Ljerka Tot Naumova do të prezantojë momentet më të rëndësishme nga jeta e shenjtores.

 

Manifestimi do të përfundojë të shtunën, më 5 shtator, me liturgjinë e shenjtë pontifikale në Katedralen „Zemra e Shenjtë e Jezusit“ në Shkup.

 

Me këtë manifestim, Shkupi, qyteti i lindjes së Shën Nënë Terezës, do t'i bëjë homazh jetës së saj të mbushur me mëshirë dhe dashuri ndaj të varfërve.