Nepal dhe Tibet, kërkohen mbi 1.300 të zhdukur, Ekspertët: Rrezik për një valë të dytë përmbytjesh

 

“Djali i motrës sime, Yubraj Sewak, ishte nisur drejt Rasuvas dhe kishte qenë në kontakt me motrën time deri rreth orës 08:00 të mëngjesit të djeshëm. Që nga përmbytja nuk kemi dëgjuar më prej tij. Emri i tij nuk figuron në asnjërën prej listave që kemi parë dhe edhe një anëtar tjetër i familjes sonë është i zhdukur.”, - theksoi familjari i Yubraj Sewak, Chitra Bahadur Nepali. 

 

“Vëllai ynë i madh është zhdukur. Emri i tij është Ram Sharan Rasaili. Ai është në mesin e të zhdukurve nga Rasuwa. Prandaj kemi dalë për ta kërkuar.”, -  u shpreh familjari i Ram Sharan Rasaili, Subash Khatani.

 

Mes personave të zhdukur ka edhe shtetas të huaj. Vendet e tyre po kërkojnë informacion për qytetarët e tyre të prekur nga katastrofa.

 

“Do të them vetëm se të paktën 34 australianë janë në mesin e të zhdukurve. Kuptojmë se këta australianë ishin pjesë e grupeve të veçanta të pelegrinazhit dhe turistëve. Nuk jam në gjendje të jap detaje të tjera për ta në këtë fazë. Prioriteti i Qeverisë është të konfirmojë vendndodhjen dhe gjendjen e tyre. Zyrtarët e Ministrisë së Jashtme janë në Nepal dhe Kinë për ta bërë këtë. Natyrisht, situata është e vështirë.”, - deklaroi ministrja e Jashtme e Australisë, Penny Wong.

 

“Gati 100 shtetas kinezë janë të zhdukur në zonat e prekura nga katastrofa në anën nepaleze. Ambasada kineze në Nepal aktualisht po kërkon verifikime të mëtejshme nga autoritetet nepaleze.”, - theksoi zëdhënësi i Ministrisë së Jashtme të Kinës, Lin Jian.

 

Sipas Shërbimit Gjeologjik të ShBA-së, katastrofa dyshohet të jetë shkaktuar nga shembja e një akullnaje, e cila solli një rrjedhë masive uji, balte dhe mbetjesh. Ekspertët paralajmërojnë për rrezikun e një vale të dytë përmbytjesh, pasi mbetjet kanë bllokuar rrjedhën e ujit në zonën kufitare. Autoritetet u kanë bërë thirrje banorëve në zonat e rrezikuara të largohen, ndërsa operacionet e shpëtimit vijojnë.