Zjarri në Pelister nën kontroll, me helikopter po shuhet zjarri në Gradec

 

“Për momentin dy zjarre janë të vështira për t’u shuar. I pari është zjarri që para dy ditësh filloi nga ana e Prespës, në rrëzë të malit Pelister. Gjatë ditës së djeshme, gjatë natës dhe deri në mëngjes u zhvillua një luftë e ashpër me flakët e zjarrit dhe sot në mëngjes ky zjarr u vu nën kontroll të plotë. Në terren janë angazhuar zjarrfikës nga Resnja dhe Manastiri, ekipet e Drejtorisë për Mbrojtje dhe Shpëtim me pesë Air Tractor, si dhe zjarrfikës vullnetarë. Në shuarjen e zjarrit ndihmojnë edhe ekipet e Pyjeve Kombëtare. Zjarri i dytë kompleks ndodhet në territorin e fshatit Gradec, në Komunën e Vrapçishtit, ku është përfshirë një pyll me pisha në një terren shumë të vështirë për t’u arritur. Për shuarjen e tij është angazhuar një helikopter policor, i cili furnizohet me ujë nga një liqen aty pranë dhe çdo disa minuta kryen hedhje uji mbi vijën e zjarrit.”, - deklaroi drejtori i Drejtorisë për Mbrojtje dhe Shpëtim, Stojançe Angelov.

 

Aktive mbeten edhe disa vatra të tjera, të cilat kanë përfshirë sipërfaqe më të mëdha. Megjithatë, sipas autoriteteve, për momentin ato nuk paraqesin rrezik të drejtpërdrejtë për vendbanimet, pyjet cilësore apo sipërfaqet e tjera pyjore. Angelov u bëri thirrje qytetarëve që të tregojnë kujdes të shtuar, pasi rreziku nga zjarret mbetet jashtëzakonisht i lartë edhe gjatë muajit shtator.