Mucunski në Forumin Strategjik të Bledit: Integrimi evropian duhet t’i transformojë institucionet, jo identitetet

 

Në fjalën e tij, ministri Mucunski iu referua sfidave aktuale gjeopolitike dhe të sigurisë, rëndësisë strategjike të korridoreve të transportit, qëndrueshmërisë rajonale dhe perspektivës evropiane të Ballkanit Perëndimor.

 

Ai theksoi se anëtarësimi në NATO paraqet një përparësi të rëndësishme përmes shkëmbimit të informacionit, politikave të përbashkëta për qëndrueshmëri dhe parandalim, por njëkohësisht paralajmëroi se rreziqet e sigurisë në rajon mbeten të pranishme. Në këtë kontekst, ai përmendi agresionin rus ndaj Ukrainës, ndikimin dhe aktivitetet e Kinës dhe Iranit, si dhe kërcënimet më të gjera konvencionale dhe jokonvencionale, përfshirë ndikimin kibernetik dhe përpjekjet për shtrëngim ekonomik.

 

Theks i veçantë iu kushtua rëndësisë strategjike të Korridoreve VIII dhe X. Mucunski theksoi se vendi ynë është i vetmi në rajon ku kryqëzohen të dy korridoret, duke nënvizuar se infrastruktura e transportit dhe energjetike ka rëndësi të drejtpërdrejtë për qëndrueshmërinë ekonomike, politike dhe të sigurisë.

 

“Qëndrueshmëria jonë është po aq e fortë sa është infrastruktura jonë”, tha Mucunski.

 

Duke folur për integrimin evropian, ai theksoi se investimet në infrastrukturë dhe ndërlidhjen rajonale duhet të shoqërohen edhe me investim të qartë politik në zgjerimin e Bashkimit Evropian.

 

“Nëse Evropa dëshiron të flasë me gjuhën e gjeopolitikës, atëherë zgjerimin nuk mund ta shohë përmes logjikës së burokracisë. Nevojitet një vizion strategjik. Kur vendet kandidate shënojnë përparim dhe janë plotësisht të harmonizuara me Politikën e Përbashkët të Jashtme dhe të Sigurisë të Bashkimit Evropian, ky përparim duhet të jetë i dukshëm”, theksoi Mucunski.

 

Mucunski theksoi se zgjerimet e mëparshme të Bashkimit Evropian nuk ishin rezultat vetëm i përmbushjes së kritereve, por edhe i vullnetit politik dhe vendimit strategjik se zgjerimi është në interes të Evropës.

 

“Një pikë e vërtetë kthese do të ishte që disa vende të rajonit të bëhen anëtare të Bashkimit Evropian. Kjo do të ishte dëshmi se termat ‘momentum’ dhe ‘dritare mundësish’, të cilat i dëgjojmë prej disa vitesh, më në fund janë kuptuar dhe perceptuar plotësisht”, theksoi Mucunski.

 

Njëkohësisht, ai vlerësoi se nga Brukseli vijnë sinjale inkurajuese për një qasje të re ndaj politikës së zgjerimit dhe përshtatjen e saj me kontekstin aktual gjeopolitik.

 

“Kërkesa jonë është e qartë – integrimi evropian të jetë model për transformimin e institucioneve tona, e jo përpjekje për transformimin e identiteteve tona. Na vlerësoni mbi bazën e meritave dhe sipas asaj nëse, në kohë të përmbysjeve gjeopolitike, jemi të harmonizuar me politikën e jashtme dhe të sigurisë të Bashkimit Evropian”, u shpreh Mucunski.

 

Në fjalën e tij, ministri veçoi edhe shembullin e Sllovenisë dhe Kroacisë si vende që, pavarësisht sfidave në të kaluarën, sot kanë marrëdhënie të forta dhe mund të shërbejnë si shembull dhe mbështetje e rëndësishme për vendet e Ballkanit Perëndimor në ndërtimin e bashkëpunimit më të fuqishëm rajonal dhe qëndrueshmërisë strategjike.