Klekovski: Në RMV gjithsej 55 të prekur nga ethet e Nilit

 

“Hospitalizimi i parë ka qenë në muajin maj, por rritja më e theksuar ka filluar të ndjehet që nga data 13 korrik, prej kur edhe filluan të zbatohen masat. Kurse hospitalizimet më të mëdha i kemi pasur në fillim të muajit gusht, ndërsa qyteti me raste më të mëdha mbetet qyteti i Shkupit. Po ashtu dua t’i apeloj qytetarët që në numër më të madh t’i vaksinojnë fëmijët e tyre nga fruthi, sepse numri i tyre është shumë i ulët apo rreth 62 për qind kemi të vaksinuar, e bëjmë këtë apel, sepse numri i të prekurve nga fruthi dukshëm po rritet në Kosovë dhe Bullgari.”, - deklaroi ministri i Shëndetësisë, Sasho Klekovski.

 

 

Në Klinikën Infektive në Shkup janë të hospitalizuar 19 persona, 5 prej të cilëve janë në gjendje më të rëndë.

 

“Momentalisht në Klinikën për Sëmundje Infektive në repartin për mjekim intensiv janë 5 pacientë, ku të gjithë 5 pacientët janë me pasqyrë të rëndë klinike, tre prej tyre janë të ekstubuar, dhe pasqyra klinike është përmirësuar, dy pacientë i kemi në trajtim me respirator, ndërsa numri tjetër nga 19 pacientët e hospitalizuar është e mirë, dhe rastet e rënda janë të moshës së shtyrë dhe të gjithë janë të gjinisë mashkullore. Ndërsa deri më tani janë shëruar plot 28 persona.”, - theksoi drejtori i Klinikës Infektive në Shkup, Fadil Cana.

 

Njëherësh nga Ministria e Shëndetësisë dhe nga Instituti i Shëndetit Publik kanë apeluar se të dhënat e fundit të cilat vijnë nga Kosova dhe Bullgaria tregojnë se numri i fëmijëve të prekur nga fruthi, është alarmante, dhe duhet të fillohet një fushatë sensibilizuese, për vaksinimin e fëmijëve, sepse numri i të vaksinuarve në vendin tonë është shumë i ulët. Sipas Institutit për Shëndetin Publik, që të krijohet një imunitet kombëtar edhe në nivel nacional edhe në atë regjional, numri i të vaksinuarve duhet të jetë diku rreth 95 për qind. Ndërsa shifrat tek ne tregojnë se për hepatitin B kemi 77 për qind të vaksinuar, për Haemophilus Influenzae kemi 78 për qind, Deftaria Tetanus Pertusis 79 për qind, vaksinimi kur polios 79 për qind, dhe HPV 51 për qind.