Katari paralajmëron për përshkallëzim të ri pas sulmeve iraniane në rajon

Katari ka paralajmëruar të mërkurën se sulmet e ripërtërira iraniane ndaj Jordanisë, Bahreinit dhe Kuvajtit përbëjnë një përshkallëzim të rrezikshëm, i cili mund të vështirësojë përpjekjet diplomatike për uljen e tensioneve në rajon.

 

Në një deklaratë, Ministria e Jashtme e Katarit i cilësoi sulmet si një “shkelje flagrante të sovranitetit dhe integritetit territorial” të vendeve të prekura, si dhe shkelje të së drejtës ndërkombëtare dhe Kartës së Kombeve të Bashkuara.

 

Doha e ka mbajtur Iranin “plotësisht ligjërisht përgjegjës” për sulmet dhe pasojat e tyre, duke paralajmëruar se vazhdimi i tyre mund të dëmtojë përpjekjet politike dhe diplomatike për rikthimin e sigurisë dhe stabilitetit në rajon.

 

Katari ka shprehur gjithashtu solidaritetin e tij me Jordaninë, Bahreinin dhe Kuvajtin dhe ka deklaruar mbështetjen për masat që këto vende mund të ndërmarrin në mënyrë legjitime për mbrojtjen e sovranitetit dhe sigurisë së tyre.

 

Ministria e Jashtme e Katarit u ka bërë thirrje të gjitha palëve të shmangin veprimet që mund të zgjerojnë përshkallëzimin, duke kërkuar një rikthim në dialog dhe negociata.

 

Ndërkohë, Korpusi i Gardës Revolucionare Islamike të Iranit (IRGC) deklaroi se kishte sulmuar disa objekte ushtarake amerikane në Kuvajt, Emiratet e Bashkuara Arabe, Jordaninë, Bahrein dhe Irak.

 

Sipas autoriteteve iraniane, sulmet u kryen në përgjigje të goditjeve amerikane ndaj objektivave në Iran një ditë më parë.

 

Komanda Qendrore e SHBA-së (CENTCOM) njoftoi më herët se kishte nisur sulme ajrore kundër objektivave të IRGC-së në Iran. Pas këtyre zhvillimeve, mediat iraniane raportuan për shpërthime në disa zona të vendit, përfshirë ishullin Qeshm, Bandar Abbas, Sirik, Chabahar dhe Konarak.