Liqeni Ontario shfaqet si “Liqeni Amerika” në hartat amerikane

Apple është kompania e fundit e teknologjisë që ka miratuar emrin e ri të vendosur nga administrata e Donald Trump për Liqenin Ontario, duke e shfaqur atë si “Liqeni Amerika” në Apple Maps për përdoruesit në Shtetet e Bashkuara.

 

Ndryshimi vjen më pak se një javë pasi presidenti amerikan Donald Trump urdhëroi zyrtarisht riemërtimin e liqenit përmes një urdhri ekzekutiv. Liqeni Ontario është një nga pesë Liqenet e Mëdha të Amerikës së Veriut, së bashku me Superior, Michigan, Huron dhe Erie.

 

Vendimi vjen në një moment tensionesh të shtuara mes SHBA-së dhe Kanadasë, pas dështimit të bisedimeve tregtare në fund të gushtit dhe vendosjes nga Uashingtoni të tarifave të reja prej 50% ndaj mallrave kanadeze me vlerë rreth 20 miliardë dollarë.

 

Në Apple Maps, përdoruesit që ndodhen në SHBA do ta shohin liqenin me emrin “Liqeni Amerika”, ndërsa në Kanada do të vijojë të shfaqet si Liqeni Ontario.

 

Sipas Sekretarit të Brendshëm amerikan Doug Burgum, Trump i kërkoi personalisht Apple që të pasqyronte ndryshimin në platformën e saj të hartave.

 

Më herët, të njëjtën gjë bëri edhe Google, duke shkaktuar reagime të shumta në rrjetet sociale. Kompania shpjegoi se Google Maps pasqyron ndryshimet e emrave të përcaktuara në burimet zyrtare të qeverisë amerikane.

 

Ndërkohë, Kanadaja ka refuzuar ta njohë ndryshimin. Në brigjet e liqenit është vendosur një tabelë e re ku shkruhet: “Liqeni Ontario. Tani dhe Gjithmonë.”

 

Kryeministri i Ontarios, Doug Ford, e ka bërë të qartë qëndrimin e provincës.

 

“Shumë kohë para Presidentit Trump, ky liqen quhej Liqeni Ontario. Shumë kohë pasi Presidenti Trump të jetë larguar, ai do të quhet ende Liqeni Ontario”, tha Ford, sipas BBC.

 

Ndërkohë, jo të gjitha kompanitë kanë pranuar të ndjekin ndryshimin. Shërbime të tjera hartografike, përfshirë MapQuest, kanë vendosur të ruajnë emrin tradicional të liqenit.

 

MapQuest kishte refuzuar më parë edhe kërkesën për të ndryshuar emrin e Gjirit të Meksikës në “Gjiri i Amerikës”.

 

Përplasja rreth emrit të liqenit ka marrë edhe një dimension tjetër në tregun e aplikacioneve. Qëndrimi i MapQuest duket se ka tërhequr mbështetje të konsiderueshme nga përdoruesit amerikanë, duke e çuar aplikacionin në krye të renditjes së Apple App Store më 1 shtator, madje përpara ChatGPT-së.