Përplasje në Tiranë, u arrestuan 14 protestues

 

Për të paktën 30 minuta policia bëri thirrje që protestuesit të largoheshin nga hyrja e kryeministrisë, si dhe të zhbllokonin lëvizjen e makinave.

 

Këto thirrje, protestuesit i injoruan. U ulën në rrugë, vijuan bllokimin dhe goditën e shtynë policët.

 

Efektivët ndërhynë duke i shpërndarë dhe vetëm pasi kishin kaluar dy orë, kryeministri Rama mundi të largohej me masa të shtuara sigurie. 

 

Tensioni u zhvendos në komisariatin numër 3 në Tiranë, me thirrjet e protestuesve për lirimin e të ndaluarve.

 

Sot, policia njoftoi se arrestoi 14 protestues, mes tyre edhe organizatorë të tubimit. Ata janë nën akuzë për 4 vepra penale, organizim dhe pjesëmarrje në tubime të paligjshme, kundërshtim të punonjësve të policisë, prishje të qetësisë publike dhe bllokim të qarkullimit rrugor. 3 të tjerë po hetohen në gjendje të lirë.