Ethet e Nilit Perëndimor, regjistrohet viktima e shtatë, 19 pacientë të hospitalizuar

 

 

“Sa i përket gjendjes me ethet e Nilit Perëndimor, që nga informimi im i fundit kemi një person të vdekur. Bëhet fjalë për pacientin, i cili ishte i hospitalizuar për kohën më të gjatë, mbi 38 ditë në spital. Kemi edhe një rast të ri të dyshimtë gjatë këtyre tre ditëve nga informimi i fundit. Në thelb, gjatë kësaj jave, përkatësisht gjatë ditëve të fundit, që nga fundjava e deri tani, të gjitha rastet e reja janë nga Shkup Veriu. Pra, numri i pacientëve të hospitalizuar është i njëjtë, mendoj se janë 19 pacientë, pasi kemi vetëm një rast të ri të dyshimtë.”, - deklaroi ministri i Shëndetësisë, Sasho Klekovski.

 

Lidhur me faktin se të gjitha viktimat e regjistruara deri tani janë meshkuj, Klekovski shpjegoi se rreziku për zhvillimin e formës së rëndë të sëmundjes dhe vdekshmëria janë më të larta te meshkujt. 

 

“Studimi më i madh është kryer në Amerikë, mbi më shumë se 3.000 raste. Në atë studim është e qartë se si morbiditeti, gjegjësisht shkalla e sëmundjes me formën neuroinvazive, ashtu edhe vdekshmëria janë më të larta te meshkujt. Pra, tek ne morbiditeti është 3,7: 1 në raportin meshkuj - femra. Kjo është një karakteristikë demografike.”, - theksoi ministri i Shëndetësisë, Sasho Klekovski.

 

Autoritetet shëndetësore vijojnë monitorimin e situatës, ndërsa komunave u është bërë thirrje për forcimin e masave parandaluese ndaj përhapjes se etheve të Nilit Perëndimor.