Kurti: Po bisedojmë për presidentin, synimi, shmangia e zgjedhjeve të reja

 

“Vazhdojmë me takime, bisedime, në mënyrë që ta zgjedhim presidentin dhe të mos kemi nevojë t’i përsërisim zgjedhjet që janë të paarsyeshme.”, - deklaroi kryeministri i Kosovës, Albin Kurti.

 

Kurti nuk dha detaje se me cilat subjekte politike po zhvillohen bisedimet, por tha se komunikimi për këtë çështje është i vazhdueshëm. Ai u shpreh se synimi është që përmes marrëveshjes politike të shmanget përsëritja e zgjedhjeve dhe të gjendet një zgjidhje për funksionalizimin e institucioneve. Lidhur me paralajmërimet e disa deputetëve për bojkotimin e procesit të zgjedhjes së presidentit, Kurti tha se ai vazhdon të jetë në komunikim me përfaqësuesit politikë.

 

“Unë jam vazhdimisht me të tjerët dhe besoj që duhet t’ua shtroni pyetjet atyre të cilët thonë se do ta bojkotojnë zgjedhjen e presidentit.”, - theksoi kryeministri i Kosovës, Albin Kurti.

 

Ndërkohë, vëmendja politike është përqendruar edhe te vazhdimi i seancës konstituive të Kuvendit. Kurti ka konfirmuar se deputetët e LVV-së do të jenë të pranishëm në seancën e radhës, ndërsa mbetet e paqartë nëse partitë do të arrijnë një marrëveshje që do ta zhbllokojë procesin institucional. Çështja e presidentit shihet si një prej pikave kyçe për tejkalimin e situatës aktuale, pasi për zgjedhjen e tij kërkohet shumicë e cilësuar në Kuvend. Për këtë arsye, takimet dhe negociatat ndërmjet partive pritet të intensifikohen në ditët në vijim.