Samiti ndërkombëtar i hapësirës në Paris, Makron: Hapësira nuk është më e paprekshme

 

“Hapësira është kudo dhe ky samit përcjell një mesazh force dhe dialogu. Realiteti na detyron të pranojmë se hapësira nuk është më një strehë e sigurt. Qeverisja e përbashkët, me përfshirjen e të gjithë aktorëve kryesorë, është thelbësore për t’u përballur me këto sfida. Ky është qëllimi i këtij samiti.”, - deklaroi presidenti i Francës, Emanuel Makron.

 

Në këtë drejtim, Evropa synon të forcojë kapacitetet e saj hapësinore dhe të garantojë më shumë pavarësi në këtë sektor. Në Paris, ku janë mbledhur delegacione nga më shumë se 120 vende, fokusi është edhe te mbrojtja e infrastrukturës satelitore dhe zhvillimi i sistemeve të reja për komunikime të sigurta.

 

 

Në të njëjtën linjë me këtë ambicie evropiane, Bullgaria po zgjeron bashkëpunimin e saj në teknologjitë hapësinore. Në Paris, në prani të Makronit dhe kryeministrit bullgar Rumen Radev, kompania bullgare “EnduroSat” nënshkroi marrëveshje me kompaninë franceze “Arianespace” për përdorimin e shërbimeve të saj të lëshimit nga viti 2029.

 

“Nuk është rastësi që kjo marrëveshje po nënshkruhet në prani të presidentit francez Makron dhe në prezencën time. Ajo i hap derën Bullgarisë për të zënë vendin që i takon në ekosistemin evropian të hapësirës.”, - u shpreh kryeministri i Bullgarisë, Rumen Radev.

 

Marrëveshja parashikon që satelitët e “EnduroSat” të lëshohen me raketat “Ariane 6”. Kompania bullgare ka njoftuar gjithashtu ndërtimin e një qendre të re për zhvillimin e teknologjive hapësinore pranë Sofjes. Samiti dyditor në Paris zhvillohet në një kohë kur hapësira po merr gjithnjë e më shumë rëndësi strategjike. Evropa synon të mbrojë asetet e saj hapësinore dhe të sigurojë qasje të pavarur në hapësirë, përballë kërcënimeve dhe një gare gjithnjë e më të madhe globale.