Kriza në Detin e Kuq: Trafiku detar bie në nivele rekord

Transporti tregtar përmes ngushticës strategjike Bab el-Mandeb ka pësuar një rënie të ndjeshme, duke zbritur në rreth 26 anije në ditë, krahasuar me rreth 70 anije në ditë përpara krizës së Detit të Kuq.

Sipas të dhënave të Kpler, 25 anije kaluan ngushticën të martën, 28 të mërkurën dhe 26 të enjten, duke e çuar mesataren e tre ditëve në rreth 26 anije në ditë. Ndërkohë, mesatarja 10-ditore është rreth 27 anije.

Rënia e trafikut ka nisur që prej fundit të vitit 2023, pas sulmeve të Huthive ndaj anijeve tregtare. Kompanitë e mëdha të transportit detar nisën të shmangnin Detin e Kuq dhe të përdornin rrugën përreth Kepit të Shpresës së Mirë, duke rritur ndjeshëm distancën dhe kohën e transportit.

Të dhënat e IMF PortWatch tregojnë se gjatë vitit 2025, trafiku në Bab el-Mandeb ishte mesatarisht rreth 33.5 anije në ditë, më pak se gjysma e nivelit prej 71 anijesh në ditë të regjistruar para krizës.

Situata është përkeqësuar më tej gjatë muajve të fundit. Trafiku ra në 34 anije në ditë në korrik dhe në 28 në gusht, ndërsa në shtator ka vijuar të qëndrojë në nivele të ulëta.

Ndërkohë, edhe Ngushtica e Hormuzit po përballet me një rënie drastike të trafikut. Vetëm shtatë anije mallrash kaluan aty të enjten, ndërsa para nisjes së luftës me Iranin, ngushtica përshkonte rreth 125 anije të mëdha tregtare në ditë.Ekspertët vlerësojnë se rënia e trafikut në këto dy korridore detare rrit shqetësimet për zinxhirët globalë të furnizimit dhe tregtinë ndërkombëtare.