Gjykata Kushtetuese nikoqire e konferencës rajonale për rritjen e besimit të publikut

 

Në fokus të konferencës do të jetë ndërtimi dhe forcimi i besimit të publikut në gjykatat kushtetuese, me theks të veçantë në pavarësinë dhe kredibilitetin e gjyqësisë kushtetuese, transparencën, komunikimin me publikun dhe sfidat bashkëkohore me të cilat përballen institucionet në kushtet e zhvillimit të përshpejtuar informativ dhe teknologjik.

 

Konferencën do ta hapin kryetari i Gjykatës Kushtetuese, dr. Darko Kostadinovski, dhe dr. Stefan Pirner, drejtues i Departamentit të Projekteve për Ballkanin Perëndimor pranë IRZ-së.

 

Në kuadër të paneleve të diskutimit do të marrin pjesë kryetarë dhe gjyqtarë të gjykatave kushtetuese të rajonit, mes tyre Mirsad Qeman, kryetar i Gjykatës Kushtetuese të Bosnjë e Hercegovinës, gjyqtarët e Gjykatës Kushtetuese të Republikës së Maqedonisë së Veriut, mr. Tatjana Vasiq-Bozaxhieva dhe dr. Osman Kadriu, si dhe përfaqësues të gjykatave kushtetuese të Malit të Zi dhe Serbisë.

 

Fjalim do të mbajë edhe Winfried Schubert, ish-kryetar i Gjykatës Kushtetuese të landit të Brandenburgut dhe ish-kryetar i Gjykatës së Lartë të landit në Naumburg të Gjermanisë, i cili do të flasë për zhvillimin dhe rolin e gjyqësisë kushtetuese gjermane, besimin e publikut, sfidat dhe qëndrueshmërinë institucionale.

 

Në konferencë do të marrin pjesë gjithashtu përfaqësues të IRZ-së, korit diplomatik, komunitetit akademik dhe gjyqtarë.

 

Qëllimi i konferencës është që përmes shkëmbimit të përvojave rajonale dhe evropiane të diskutohen mënyrat se si gjykatat kushtetuese e ndërtojnë dhe e ruajnë besimin e publikut, duke ruajtur njëkohësisht pavarësinë dhe autoritetin e tyre institucional.