Kumanovë, fillon rikonstruimi i fushës ndihmëse të KF “Bashkimi”

Së shpejti KF "Bashkimi" nga Kumanova do të bëhet edhe me një terren modern stërvitor. Kjo falë një projekti të Ministrisë së Sportit në vazhdën e përmirësimit të kushteve në funksion të zhvillimit dhe avancimit të cilësisë së futbollit. Për këtë qëllim në nismën e punimeve për rikonstruimin e terrenit ndihmës të KF "Bashkimi" morën pjesë edhe ministri Borko Ristovski dhe zëvendësministrja Safije Sadiki Shahini.

“Siç e shihni, veçse kemi filluar me punimet për rikonstruimin e këtij stadiumi. Ky ka qenë një ndër projektet e kërkuara të kamotshme të qytetarëve dhe sportdashësve të Kumanovës, mirëpo më herët asnjëherë nuk u realizua, edhe pse shumë u premtua nga mandatet e kaluara, kurse ne e premtuan para 1 viti dhe ja tani po fillojmë ta realizojmë këtë premtim. Së shpejti për një kohë shumë të shkurt ky stadium falë rikonstruimit, do t’i plotësojë të gjitha kushtet që u nevojiten sportistëve.”, - deklaroi zëvendësministrja për Sport, Safije Sadiki Shaini.

“Jemi të kënaqur, sepse kemi shumë vite që e presim këtë investim e që nuk u realizua asnjëherë. Ne jemi munduar si klub ta mbajmë terrenin së bashku me trajnerët, qytetarët, tani këta që e dhanë premtimin edhe po e mbajnë, pasi që, ja po shihet, sepse punët veç më filluan.”, - theksoi pronari i KF ”Bashkimi” Kumanovë, Burak Hida.

Terreni ndihmës do të posedojë tribuna, zhveshtore, ndriçim dhe pajisje tjera të nevojshme. I njëjti pritet të përfundojë brenda një muaj e gjysmë. (Fatlum Aqifi, TVM2)